ყოფილი პრეზიდენტის მიხეილ სააკაშვილის დედის გიული ალასანიას განცხადებით, მიხეილ სააკაშვილი იმ ადამიანების მადლობელია, რომლებიც მის მხარდამჭერ აქციას შეურთდნენ.
როგორც მან კლინიკა „ვივა მედში" ჟურნალისტებთან განაცხადა, ყოფილი პრეზიდენტი თავს „სუსტად გრძნობს" და „პრაქტიკულად ვერ გადაადგილდება".
„სულ წევს, როცა თავს წამოწევს, ერთ ნაბიჯსაც ვერ გადადგამს, თუ არ დაეყრდნო. ძირითადი თემა იყო დღევანდელი დღე. სრულიად გაოგნებული იყო იმით, რაც ხდება დღეს, მარტო ჩვენთან კი არა, რაც ხდება მსოფლიოში, ავსტრალიიდან დაწყებული.
ძალიან მადლობელია, რადგან ზოგიერთ შემთხვევაში გმირობას უდრის იმ ადამიანებისთვის, რადგან ისინი მუშაობენ, ზოგიერთი წასულია ლუკმა-პურის საშოვნელად და მაინც რაღაცნაირად ახერხებენ. ყველა ემიგრანტი მუშაობს და ეს მათთვის განსაკუთრებით ძნელია. თანაც ეს ორგანიზებული არ იყო",- განაცხადა გიული ალასანიამ.