აფხაზეთში ელექტროენერგია ისევ ოთხი საათის განმავლობაში იყო გათიშული. ხელისუფლების იმედი, რომ რუსეთიდან მიღებული ელექტროენერგიის ნაკადი დაფარავდა დეფიციტს, არ გამართლდა და სოხუმი კვლავ დაუბრუნდა დენის გრაფიკს.

გარდა ამისა, ბოლო წლებში, კრიპტოვალუტის უკონტროლო მაინინგის გამო, ელექტროენერგიის მოხმარება საგრძნობლად გაიზარდა. ენერგოკომპანია ჩერნომორენერგოში აცხადებენ, რომ ამჟამად აფხაზეთში ელექტროენერგიის მოხმარება შარშანდელზე 15 პროცენტით მეტია და, შესაბამისად, ამიტომაც არის ელექტროენერგიის დეფიციტი. 

აფხაზეთმა რუსეთს მოსთხოვა 1-ლი იანვრიდან 31 მარტამდე პერიოდში, ანუ იმ მომენტამდე, სანამ ენგურჰესი დასტაბილურდება – 715 მილიონი კვტ/სთ. თუმცა, რუსულმა მხარემ მხოლოდ 600 მილიონი კვტ/სთ გამოყო. შედეგად დაფიქსირდა 115 მლნ კვტ/სთ დეფიციტი, რომელიც მთავრობამ გრაფიკით გაანაწილა.

გასული წლის ნოემბრიდან მოყოლებული აფხაზეთი ამ რეჟიმში ცხოვრობს, თუმცა ახალი წლის დღეებში, როგორც იქნა, გრაფიკი გაუქმდა. მაგრამ როგორც აღმოჩნდა – მხოლოდ ცოტა ხნით.

1-ლი იანვრიდან ელექტროენერგიის ფასი ფიზიკური პირებისთვის გაიზარდა 70 კაპიკიდან 1 კვტ/სთ-ზე 1,30 რუბლამდე [0,01 დოლარიდან 0,019 აშშ დოლარამდე], იურიდიული პირებისთვის 1,4 რუბლიდან 2 რუბლამდე [0,021 აშშ დოლარიდან 0,030 აშშ დოლარამდე] 1 კვტ/სთ-ზე.

ამასთან, აბონენტები ჩივიან, რომ ქსელში ძაბვა არ აღემატება 110-120 ვოლტს, რის გამოც საყოფაცხოვრებო ტექნიკა ფუჭდება.