თბილისის საქალაქო სასამართლოში ვაკის პარკში მომხდარი ტრაგედიის საქმეზე დაკავებული 9 პირის სასამართლო პროცესი მიმდინარეობს.

დღევანდელ სხდომაზე ბრალდების მხარის 3 მოწმეს დაკითხავენ, მათ შორის სასამართლოში ჩვენებას პროექტის ავტორი ორგანიზაციის „ელემსის" ერთ-ერთი არქიტექტორი შალვა ქურიძე მისცემს.

როგორც საქმის პროკურორი არჩილ ტყეშელაშვილი აცხადებს, შპს „ელემსის" წარმომადგენლებმა სამუშაოების პროექტი შეადგინეს და სწორედ, პროექტის შედგენასა და გაყალბებულ დოკუმენტაციასთან დაკავშირებით ექნებათ კითხვები.

თავის მხრივ, ერთ-ერთი ბრალდებულის, „გრინსერვის პლუსის" დირექტორის, ლაშა ფურცხვანიძის ადვოკატი, არჩილ ჩოფიკაშვილი აცხადებს, რომ მოწმე შალვა ქურიძეს ელექტროუსაფრთხოებასთან დაკავშირებით კითხვებზე პასუხი უნდა ჰქონდეს. უფლებადამცველები მოწმეებს ასევე ჰკითხავენ, თუ რატომ არ იყო უსაფრთოხების ზომები მიღებული მათ დასკვნაში.

ცნობისთვის, 2022 წლის 13 ოქტომბერს, ვაკის პარკში მომხდარი ტრაგედიის შედეგად, 13 წლის მარიტა მეფარიშვილი გარდაიცვალა, ორი მოზარდი - ანდრია ლორთქიფანიძე და ლაზარე ლობჟანიძე კი დაშავდა. მეფარიშვილის გარდაცვალების საქმეზე 9 პირია ბრალდებული, რომელთაც აღკვეთის ღონისძიების სახით პატიმრობა აქვთ შეფარდებული, ნაწილ მათგანს საქართველოს გენერალურმა პროკურატურამ ბრალდება დაუმძიმა. კერძოდ, ბრალი დაუმძიმდათ - "გრინსერვისი+"-ის დირექტორს, ლაშა ფურცხვანიძეს უხარისხო სამუშაოების შესრულების ფაქტზე, რამაც ადამიანის სიცოცხლის მოსპობა და ორი ადამიანის ჯანმრთელობის დაზიანება გამოიწვია (სსკ-ის 251-ე მუხლის მე-2 და მე-3 ნაწილი), ასევე ყალბი ოფიციალური დოკუმენტების გამოყენების ფაქტზე, რამაც მნიშვნელოვანი ზიანი გამოიწვია (362-ე მუხლის მე-2 ნაწილის „ბ" ქვეპუნქტი)."გრინსერვისი+"-ის თანამშრომელს დევი კახოიძეს - ყალბი ოფიციალური დოკუმენტის დამზადებაში წაქეზების ფაქტზე, რამაც მნიშვნელოვანი ზიანი გამოიწვია (სსკ-ის 25,362-ე მუხლის მე-2 ნაწილის „ბ" ქვეპუნქტი) და „მშენ-ექსპერტი"-ს დირექტორს ნუგზარ ქიტიაშვილსა და ამავე კომპანიის ექსპერტს დავით თუშიშვილს ყალბი ოფიციალური დოკუმენტის დამზადება, გასაღების ფაქტზე, რამაც მნიშვნელოვანი ზიანი გამოიწვია (სსკ-ის 362-ე მუხლის მე-2 ნაწილის "ბ" ქვეპუნქტი).