ჟენევის საერთაშორისო დისკუსიების 57-ე რაუნდი დასრულდა. შეხვედრა საქართველოს საგარეო საქმეთა მინისტრის მოადგილემ, ლაშა დარსალიამ შეაფასა. მან განაცხადა, რომ მოლაპარაკებების პროცესში საქართველოს პარტნიორების მხარდაჭერა ჰქონდა და აღნიშნა, რომ რუსეთის დელეგაცია საკითხების განხილვას დესტრუქციულად უდგებოდა.
„როგორც მოსალოდნელი იყო, საკმაოდ რთული რაუნდი გაიმართა. სამწუხაროდ, რუსეთის დელეგაციამ კიდევ ერთხელ გამოაჩინა დესტრუქციული მიდგომა. დესტრუქციული მიდგომა იყო პრაქტიკულად ყველა ძირითად საკითხზე, როგორიცაა 6-პუნქტიანი შეთანხმების შესრულება, უსაფრთხოების უზრუნველყოფა, ადგილზე ადამიანის უფლებათა მდგომარეობა. არ გამოიჩინა არანაირი ნება, რომ ოდნავ მაინც გაუმჯობესდეს ვითარება და ბოლოს საერთოდ, ისევე როგორც წინა რაუნდებზე, დევნილთა საკითხების განხილვისას დატოვეს მოლაპარაკებათა მაგიდა. განსაკუთრებით მინდა მოლაპარაკებათა პროცესში ჩვენი პარტნიორების მტკიცე პოზიციას გავუსვა ხაზი. ეს ეხება აშშ-ს, გაეროს, ეუთოს, ევროკავშირს - ანუ ყველას, ვინც მონაწილეობდა მოლაპარაკებათა პროცესში. საქართველოს ჰქონდა სრული მხარდაჭერა", - განაცხადა დარსალიამ.