რუსეთის პრეზიდენტის პრესმდივნის დმიტრი პესკოვის განცხადებით, ევგენი პრიგოჟინის წინააღმდეგ აღძრული საქმე შეწყდება, ,,ვაგნერი” თავის ბანაკში დაბრუნდება, პრიგოჟინი კი ბელარუსში წავა.
„მიღწეულია შეთანხმება, რომ ვაგნერელები გაემგზავრებიან საველე ბანაკებში, თავად პრიგოჟინი კი - ბელორუსიაში. ხელისუფლება არ დევნის იმ ვაგნერელებს, ვინც მონაწილეობა მიიღო აჯანყებაში, მათი წინა ხაზზე დამსახურების გათვალისწინებით“, - განაცხადა პესკოვმა.
სააგენტო „ტასს”-ის ცნობით, პესკოვმა არ იცის, რას გააკეთებს პრიგოჟინი ბელარუსში.
როგორც პესკოვმა აღნიშნა, „ვაგნერის” კერძო სამხედრო კომპანიის მსურველ მებრძოლთა ნაწილი თავდაცვის სამინისტროსთან გააფორმებს კონტრაქტებს.
მან ასევე თქვა, რომ ეს წინადადება მხოლოდ მათზე ვრცელდება, ვინც დღევანდელ მოვლენებში არ მონაწილეობდა.