აშშ-ის სახელმწიფო მდივანის ენტონი ბლინკენის განცხადებით, აშშ რუსეთში განვითარებულ მოვლენებს ყურადღებით აკვირდება.
„თუ ამას 16 თვის წინანდელ კონტექსტში დააყენებთ, პუტინი უკრაინაში კიევის ზღურბლზე იყო და ცდილობდა რამდენიმე დღეში აეღო ქალაქი, წაეშალა ქვეყანა რუკიდან. ახლა მას მოუწია მოსკოვი, რუსეთის დედაქალაქი დაეცვა, საკუთარი დაქირავებულებისგან", - განუცხადა ბლინკენმა ABC -ს.
ბლინკენმა რუსეთში განვითარებულ მოვლენებს და პრიგოჟინის ამბოხს უწოდა "პირდაპირი გამოწვევა პუტინის ავტორიტეტისთვის".
ამასთან, აშშ-ის სახელმწიფო მდივნის თქმით, არ ფიქრობს, რომ ეს საბოლოო მოქმედება იყო.
"ჩვენ არ გვინახავს საბოლოო მოქმედება. ჩვენ ამას ძალიან ყურადღებით ვაკვირდებით", - განაცხადა ბლინკენმა.
რუსეთში ამბოხი პარასკევს დაიწყო მას შემდეგ, რაც „ვაგნერის" ჯგუფის ხელმძღვანელმა ევგენი პრიგოჟინმა, რუსული ძალები „ვაგნერის" ჯარების პოზიციების სარაკეტო თავდასხმაში დაადანაშაულა. აღნიშნულის გამო პრიგოჟინი განხორციელებული დარტყმის ავტორებს დასჯით დაემუქრა. „ვაგნერმა" სახელმწიფო საზღვარი გადაკვეთა, ხოლო მოგვიანებით თქვა, რომ მისმა სამხედრო კომპანიამ დონის როსტოვის სამხედრო ობიექტები და აეროდრომი კონტროლზე აიყვანა. პრიგოჟინის განცხადებები გამო, რუსული მედიის ინფორმაციით, მოსკოვში სამხედრო მზადყოფნის ბრძანება გაიცა, როსტოვის ქუჩებში კი ჯავშანტექნიკა გამოჩნდა. ამასთან, რუსული გამოცემის ცნობითვე, რუსეთში, შეიარაღებული აჯანყებისკენ მოწოდების მუხლით ევგენი პრიგოჟინის წინააღმდეგ სისხლის სამართლის საქმე აღიძრა.
მედია წერს, რომ ამბოხი დასრულდა მას შემდეგ, რაც პრიგოჟინი დათანხმდა შეთანხმებას, რომლის მიხედვითაც ის ბელორუსიაში უნდა წასულიყო, ხოლო მოსკოვმა გააუქმა მის წინააღმდეგ სისხლის სამართლის ბრალდება. კვირას „ვაგნერის" ჯარებმა რუსეთის სამხრეთ ვორონეჟის რეგიონიდან გასვლა დაიწყეს.