თბილისის მერმა კახა კალაძემ დედაქალაქის მთავრობის სხდომაზე ზონალურ-საათობრივი პარკირების ახალ არეალებზე ისაუბრა.
„ქალაქ თბილისის მუნიციპალიტეტის მერიის სატრანსპორტო პოლიტიკის ფარგლებში ეტაპობრივად განისაზღვრება ზონალურ-საათობრივი პარკირების არეალები. როგორც მოგეხსენებათ, აღნიშნული სისტემა წარმატებით უზრუნველყოფს დედაქალაქში ქაოსური პარკირების აღმოფხვრასა და მოწესრიგებას.
ზონალურ-საათობრივი პარკირების არეალებში პარკირება უფასოა წინასწარ რეგისტრირებული ადგილობრივი მცხოვრებლებისთვის, შშმ პირებისათვის, ელექტროავტომობილის მფლობელებისა და „A" კატეგორიის ტაქსებისათვის. სხვა შემთხვევაში, სტანდარტული ტარიფის ღირებულება უცვლელია და შეადგენს 1 ლარს ერთი საათის განმავლობაში.
ასევე, შეგახსენებთ, რომ მოქალაქეს შეუძლია, დღე-ღამის განმავლობაში, ოთხ სხვადასხვა ლოკაციაზე პირველი 15 წუთით ისარგებლოს უფასოდ.
მიმდინარე წლის 1 ოქტომბრიდან ზონალურ-საათობრივი პარკირება ამოქმედდება:
• ჩუღურეთის რაიონში - ივანე ჯავახიშვილის ქუჩა, ზაარბრიუკენის მოედანი, ნინოშვილისა და უზნაძის ქუჩები და მათ მიმდებარედ.
• მთაწმინდის რაიონში - ლაპიაშვილის ქუჩა, ჭოველიძისა და ჯანაშიას ქუჩები და მათ მიმდებარედ;
• ვაკის რაიონში - კუს ტბის ასახვევის მიმდებარედ.
ადგილობრივი მცხოვრებლები პირველი სექტემბრიდან საინფორმაციო ჯიხურებში შეძლებენ ზონალურ-საათობრივი პარკირების არეალებში უფასო პარკირებისთვის რეგისტრაციის გავლას და სხვა საჭირო ინფორმაციის მიღებას", - განაცხადა მერმა.