თბილისის მერიის ცნობით, სარეაბილიტაციო სამუშაოების გამო, მშვიდობის ხიდზე გადაადგილება დროებით შეიზღუდება.
"უსაფრთხოების მიზნით, 5-დან 19 ივლისამდე ხიდზე გადაადგილება შეიზღუდება.
პროექტის ფარგლებში, 200 მეტრამდე სიგრძის საფეხმავლო ხიდის დაზიანებული უბნების აღდგენა-გაძლიერება ხდება. ასევე, რეაბილიტაცია უტარდება ხიდის საკიდებს და მთავარი მალის სავალ ნაწილზე არსებულ დეფორმირებულ კიბეებს", - წერია განცხადებაში.
უწყება ამბობს, რომ ხიდის რეაბილიტაციის პროცესი უცხოელი სპეციალისტების აქტიური ჩართულობითა და ზედამხედველობით ხორციელდება.
მშვიდობის ხიდის რეაბილიტაციის პროექტის ღირებულება 1 400 000 ლარს შეადგენს, სარეაბილიტაციო სამუშაოები მიმდინარე წლის აგვისტოში დასრულდება.