ძლიერმა წვიმამ სენაკის მუნიციპალიტეტში პრობლემები შექმნა. ადგილობრივების ინფორმაციით, ქალაქის ტერიტორიაზე დაიტბორა საცხოვრებელი სახლები, ქუჩები, საკარმიდამო ნაკვეთები და სავარგულები. ანალოგიური მდგომარეობაა რამდენიმე ადმინისტრაციულ ერთეულშიც.
როგორც მერიაში აცხადებენ, ადგილობრივი თვითმმართველობისა და შესაბამისი სამსახურების წარმომადგენლები შექმნილ ვითარებას ადგილზე ეცნობიან. მათივე თქმით, მუნიციპალიტეტის ყველა სამსახური მუშაობის საგანგებო რეჟიმზეა გადაყვანილი, მობილიზებულია ჯგუფები, რომლებიც მოსახლეობას გაუწევენ დახმარებას სტიქიასთან ბრძოლაში.
ამასთან, როგორც მერიაში აცხადებენ, მუშაობს მძიმე ტექნიკა, პარალელურად მიმდინარეობს სტიქიის შედეგების აღმოფხვრის პროცესი. სტიქიით მიყენებულ ზარალს შესაბამისი კომისია შეისწავლის.