პოლიტიკოსებში ყოფილი „ნაცი" არ არსებობს. გამოჩნდა, რომ მათ უცხოეთში ერთი პატრონი ჰყავთ. როცა საჭირო იქნება, ერთად მოიყრიან თავს. ანუ, ერთი გენეალოგიური შტო აქვთ, - ამის შესახებ მოძრაობა „ხალხის ძალის" წევრმა, გურამ მაჭარაშვილმა განაცხადა.

მაჭარაშვილს კითხვა დაუსვეს „ნაციონალური მოძრაობისა" და ოპოზიციის სხვა წარმომადგენლების წინანდალში შეკრებასთან დაკავშირებით.

„ისინი არიან „პრიგოჟინის პარტიის" ფილიალები, მათი თავშეყრაც ამით აიხსნება. ხვდებიან, რომ ვერც ერთად და ვერც ცალ-ცალკე საზოგადოებაში სანდოობას ვერ მოიპოვებენ. ერთადერთ გზად დარჩენილი აქვთ, რომ 2024 წლის არჩევნები გაყალბებულად გამოაცხადონ და რევოლუციური პროცესები გაამძაფრონ, რასაც მათი უცხოელი პარტნიორები დააფინანსებენ. რაც შეეხება იქ ჭყონიას ყოფნას, ნაკლებად მჯერა, რომ „კოკა-კოლის" რეკლამისთვის ჩასულიყო. სამწუხაროდ, მას ბოდიშის მოხდა დასჭირდა და ახლა ბოდიშიც აღარ უშველის, ისეთ მდგომარეობაში ჩაიგდო თავი ლგბტ პროპაგანდის გამო. როცა ოჯახებში შედის და ბავშვების ფსიქოლოგიას ეხება - ყველა უნდა შეეშვას ბავშვთა ფსიქოლოგიას. ვეღარ იტყვის, რომ აპოლიტიკურია, რადგან იმ ადამიანებს აფინანსებს, ვინც რევოლუციური სცენარებისთვის ემზადებიან. მათ არ გამოუვათ. მშვილდაძის ჩასვლას რაც შეეხება, მისი ყოფნა-არყოფნა არაფერს შეცვლიდა. მშვილდაძე ადამიანის უფლებებზე რომ არ ისაუბრებდა, ეს ყველამ კარგად იცის", - განაცხადა გურამ მაჭარაშვილმა.