ტრაგედია დატრიალდა გუშინ გურიაში. სტიქიამ სამი ადამიანი იმსხვერპლა, მათ შორის ორი არასრულწლოვანი. ამ ეტაპზე, სტიქიის ზონიდან უსაფრთხო ადგილზე გადაყვანილია 50-მდე მოქალაქე.
სოფელ ჯუმათში გარდაცვლილი თორნიკე ჩხარტიშვილის ცხედარი მაშველებმა დღის პირველ ნახევარში იპოვეს, ხოლო ჩოჩხათის მუნიციპალიტეტში, კერძოდ, ჯიხანჯირში არასრულწლოვანის ძებნა ლამის მთელი დღე გრძელდებოდა. ახლობლები ბოლომდე არ კარგავდნენ იმედს, რომ მოზარდს ცოცხალს იპოვიდნენ. მე-7 კლასელი იურა გუჯაბიძის ცხედარი მაშველებმა დღის ბოლოს ნახეს. ბავშვს სტიქიის დროს დამხმარე ნაგებობაში ეძინა, რომელიც მეწყრემა დაფარა.
გარდაცვლილის შესახებ სოციალურ ქსელში მიმართვას აქვეყნებს ნინო მშვიდობაძე, ლანჩხუთის საკრებულოს ყოფილი წევრი:
"მეწყერმა ჯიხანჯირში მოზარდის სიცოცხლე შეიწირა. მძიმე ფოტოა და ფოტოზე უფრო მძიმე რეალობა... დის მეგობრებს დაუთმო საკუთარი საძინებელი და ეზოში მდგარ სამზად სახლში გადავიდა თვითონო, ამბობენ. მეწყერმაც ის სამზადი სახლი ჩაიტანა თურმე... სხვები გადაარჩინა... არ იცოდა, მაგრამ ხომ გადაარჩინა - გმირია, არც ეს იცოდა, მაგრამ გმირია მაინც... ნათელში იყოს, ქედს ვიხრი ამ პატარა ბიჭის სულის წინაშე", - წერს მშვიდობაძე.