არ ვიცი კიდევ რომელ ქვეყანაში ხდება ასეთი რამ, როდესაც პრეზიდენტი არის ადამიანი, რომელიც თავად არღვევს კონსტიტუციას, - ამის შესახებ დედაქალაქის მერმა, კახა კალაძემ განაცხადა. ამით კახა კალაძემ უპასუხა ჟურნალისტის კითხვას პრეზიდენტის ბოლო განცხადებებთან დაკავშირებით, რომელშიც სალომე ზურაბიშვილის აღნიშნავს, რომ ვიზიტებს გააგრძელებს.
კალაძის თქმით, გულდასაწყვეტია, რომ პრეზიდენტის მხრიდან კონსტიტუციის დარღვევა ჩვეულებრივ ნორმად იქცა, მაშინ, როდესაც პრეზიდენტი უნდა იყოს პირველი, ვინც კონსტიტუციას უნდა იცავდეს და პატივს სცემდეს.
კალაძის თქმით, ეს კიდევ ერთხელ მიუთითებს მის დამოკიდებულებაზე ჩვენი ქვეყნისა და ჩვენი ხალხის მიმართ.
„რაც შეეხება „ქართულ ოცნებას", ჩვენი მხრიდან იქნა ბევრი განმარტება გაკეთებული იმასთან დაკავშირებით, რომ მიუხედავად იმისა, რომ ჩვენ ვერ შევძლებთ იმპიჩმენტის ბოლომდე მიყვანას, კონსტიტუციის პატივისცემა არის მნიშვნელოვანი, მითუმეტეს, ჩვენ პოლიტიკოსები, თანამდებობის პირები უნდა ვიყოთ პირველები, ვინც პატივი უნდა ვცეთ კონსტიტუციას, კანონებს, პატივი უნდა ვცეთ ჩვენს ქვეყანას ჩვენს ხალხს. უბრალოდ წარმოუდგენელია, მე არ ვიცი კიდევ რომელ ქვეყანაში ხდება ასეთი რამ, როდესაც პრეზიდენტი არის ადამიანი, რომელიც თავად არღვევს კონსტიტუციას . ადამიანი პირველი უნდა იყოს ის, ვინც კონსტიტუციას და კანონებს უნდა იცავდეს", - აღნიშნა კალაძემ.