ისრაელის საჰაერო ძალებმა მოკლეს „ჰამასის" ერთ-ერთი მეთაური ალი ქადი, რომელიც გასულ შაბათს, ისრაელის სამხრეთ დასახლებებზე თავდასხმას ხელმძღვანელობდა. ამის შესახებ BBC წერს.

როგორც ისრაელის თავდაცვის ძალებში განმარტავენ, ის უპილოტო საფრენი აპარატით განხორციელებული თავდასხმის შედეგად დაიღუპა.

დღეს ისრაელის თავდაცვის არმიამ („ცახალი") ღაზას მოსახლეობას სექტორის სამხრეთისკენ ევაკუაციისკენ კიდევ ერთხელ მოუწოდა და უსაფრთხო საევაკუაციო მარშრუტების რუკა გამოაქვეყნა.

სარაკეტო დარტყმა ისრაელზე 7 ოქტომბერს, ადგილობრივი დროით 06:30 საათზე განხორციელდა. მომხდარზე პასუხისმგებლობა ტერორისტულმა ორგანიზაცია „ჰამასმა" აიღო. ორგანიზაციაში ისრაელის წინააღმდეგ ახალი სამხედრო ოპერაციის დაწყების შესახებ განაცხადეს. ისრაელის თავდაცვის ძალებმა „ომისთვის მზადყოფნის მდგომარეობა" გამოაცხადა და ღაზას სექტორში „ჰამასის" ობიექტებზე იერიში დაიწყო.