პარლამენტი პრეზიდენტის ვეტოს დაძლევის პროცესს მომავალი კვირიდან დაიწყებს. სალომე ზურაბიშვილმა "შეკრებებისა და მანიფესტაციების შესახებ" კანონში შესატან ცვლილებებს ვეტო ორი დღის წინ დაადო. პრეზიდენტის გადაწყვეტილებით ოპოზიცია კმაყოფილია და აცხადებს, რომ თუ ხელისუფლება ვეტოს დაძლევს, კანონპროექტი საკონსტიტუციო სასამართლოში უნდა გასაჩივრდეს.
"მაშინ, როდესაც პოლიციელის გადაწყვეტილებაზეა დამოკიდებული პროტესტის დროს სკამს გაჭრის გასაშლელს, კარავს თუ სცენას, ეს არის დემოკრატიის მთავარი გამოწვევა. ამ მოცემულობაში ვეტო არის პრეზიდენტის პრინციპული პოზიცია.
საპარლამენტო უმრავლესობა, რა თქმა უნდა, დაძლევს, მაგრამ შემდეგი ნაბიჯი არის საკონსტიტუციო სასამართლო. მიუხედავად იმისა, რომ ვადები დადგენილი არ არის, იქაც შეიძლება ამაზე ჩივილი, იმიტომ, რომ პოლიციელი კი არ უნდა მიდგენდეს ფორმას, არამედ კანონი," - განაცხადა თეონა აქუბარდიამ "კურიერთან" საუბრისას.
ამასთან, "ნაციონალური მოძრაობის" წევრის, ანა წითლიძის შეფასებით, "პრეზიდენტის მხრიდან ვეტოს დადება სწორი გადაწყვეტილება იყო."
"საქართველოს მოქალაქეებს ვერ შეაშინებს ვერანაირი საკანონმდებლო ცვლილება, ვერანაირი აკრძალვა კარვის დადგმაზე, მიკროფონის დაჭერაზე ან ა.შ. ეს საკანონმდებლო ცვლილება მხოლოდ გამოძახილია იმ შიშის, რაც დაკავშირებულია 7-8 მარტის მოვლენებთან," - აღნიშნა ანა წითლიძემ