სახელმწიფო უსაფრთხოების სამსახური, უწყებაში ყოფილი გენერალური პროკურორის ოთარ ფარცხალაძის მისვლის დამადასტურებელ ფოტო-მასალას ავრცელებს. ფოტომასალა იმ პერიოდისაა, როდესაც ფარცხალაძე უწყებაში გამოკითხვაზე იყო დაბარებული.
როგორც სუს-ში აღნიშნავენ, გამოკითხვაზე ოთარ ფარცხალაძის მისვლის კადრები „საზოგადოების მაღალი დაინტერესების გამო" გასაჯაროვდა.
„აშშ-ს სახელმწიფო დეპარტამენტის განცხადების საფუძველზე, სუს-ში საკითხის შესწავლა 15 სექტემბერს დაიწყო, ხოლო გამოძიება 19 სექტემბერს, სსკ-ის 319-ე მუხლით.
ოთარ ფარცხალაძე იმავე დღეს, 19 სექტემბერს იქნა დაბარებული და გამოცხადდა გამოკითხვაზე", - აცხადებენ სუს-ში.
შეგახსენებთ, გუშინ პარლამენტში სუს-ის უფროსის ანგარიშის მოსმენის შემდეგ ჟურნალისტები დაინტერესდნენ, არსებობს თუ არა იმის დამადასტურებელი ფოტო-მტკიცებულება, რომ ოთარ ფარცხალაძე სუს-ში გამოკითხვაზე ნამდვილად იმყოფებოდა. ამ კითხვაზე გრიგოლ ლილუაშვილმა განმარტა, რომ ასეთი მასალა არსებობს.
ლილუაშვილმა ასევე განმარტა, რომ ოთარ ფარცხალაძემ საქართველო გამოკითხვიდან მეორე დღეს დატოვა.