პოლიტიკოსები, რომლებიც „ნაციონალური მოძრაობის" ორბიტაზე ტრიალებენ, იმდენად დისკრედიტებული არიან, აზრი არ აქვს მათი გამოყენებით საზოგადოებისთვის რაღაც ახლის შეთავაზებას, - ამის შესახებ პარლამენტის ადამიანის უფლებათა დაცვის კომიტეტის თავმჯდომარემ, მიხეილ სარჯველაძემ საქართველოს ყოფილი პრეზიდენტის, მიხეილ სააკაშვილის მიერ საარჩევნო სიის შესახებ გაკეთებულ განცხადებაზე კომენტირებისას აღნიშნა.
მისი თქმით, სინამდვილეში ეს არის ფანდი საკუთარი ამომრჩევლის მოსატყუებლად.
„რეალურად ეს არის ფსონის ჩასვლა დილეტანტიზმზე და გამოცდილებაზე უარის თქმა. იძულებულია, [მიხეილ სააკაშვილი] რომ ეს ნაბიჯი გადადგას. იმდენად დისკრედიტებული არიან პოლიტიკოსები, რომლებიც „ნაციონალური მოძრაობის" ორბიტაზე ტრიალებენ, რომ უბრალოდ აზრი არ აქვს მათი გამოყენებით საზოგადოებისთვის რაღაც ახლის შეთავაზებას. ძველის შეთავაზებამ კი ამ პარტიას სასიკეთო არაფერი მოუტანა და შეუძლებელია რამე მოუტანოს. მაგრამ ჩვენი საზოგადოება საკმაოდ გამოცდილი გახდა იმისთვის, რომ ასეთ ტყუილებსა და ფანდებზე არ წამოეგოს", - აღნიშნა მიხეილ სარჯველაძემ.
პატიმარი სააკაშვილის განცხადება, რომ 2024 წლის საპარლამენტო არჩევნებში მონაწილეობა, ახალმა სახეებმა უნდა მიიღონ, განხილვის თემაა ოპოზიციაში. ოპოზიციის ნაწილი ამბობს, რომ პარტიას განახლება მართლაც ჭირდება. ნაწილისთვის, კი სააკაშვილის ეს განცხადება, არაფერს ცვლის.