როგორც საქართველოს საგარეო საქმეთა მინისტრმა, ილია დარჩიაშვილმა ევროინტეგრაციის კომისიის სხდომის დასრულების შემდეგ განაცხადა, ჩვენი ხელისუფლების გრძელვადიანი პასუხისმგებლობაა, საქართველო ევროპული ოჯახის ღირსეული წევრი გახდეს და მაქსიმალურად დაუახლოვდეს ევროპულ ოჯახს

მისი თქმით, დღევანდელ სხდომაზე ისაუბრეს არა მხოლოდ 15 დეკემბრამდე განსახორციელებელ რეფორმებზე და ამ კუთხით პროგრესზე, არამედ მომავალი წლის დღის წესრიგზეც, როგორ უნდა გადადგან კონკრეტული ნაბიჯები, რათა საქართველომ განაგრძოს რეფორმების იმპლემენტაცია.

„როგორც ცნობილია, ევროკომისიამ 8 ნოემბერს მიიღო გადაწყვეტილება, ევროპული საბჭოსთვის გასცა რეკომენდაცია, საქართველოს მიენიჭოს კანდიდატი ქვეყნის სტატუსი, რაც უმნიშვნელოვანესი წინ გადადგმული ნაბიჯია ჩვენი ქვეყნის ევროინტეგრაციის გზაზე. ეს არ არის პროცესის დასასრული, ვაგრძელებთ ჩვენი ქვეყნის ამბიციური რეფორმების დღის წესრიგის იმპლემენტაციას.

საქართველოს პრემიერ-მინისტრის ხელმძღვანელობით, დღეს გაიმართა საქართველოს ევროინტეგრაციის კომისიის სხდომა, სადაც ჩართული იყო ყველა სახელმწიფო უწყება, რომლებიც წლების განმავლობაში იღებდნენ მონაწილეობას რეფორმების განხორციელებაში. ჩვენი რეფორმების დღის წესრიგი არის ძალიან ფართო და კომპლექსური, შესაბამისად, სკრუპულოზურ და დეტალურ კოორდინაციას საჭიროებს.

დღევანდელი შეხვედრის მთავარი მიზანი იყო, კიდევ ერთხელ მოგვეხდინა იდენტიფიცირება იმ ქვეუწყების თუ უწყებების, რომლებმაც ეს კოორდინაცია წარმატებით უნდა განახორციელონ. ვცდილობთ, 15 დეკემბრამდე, როდესაც ევროპულმა საბჭომ, წევრმა ქვეყნებმა საქართველოს კანდიდატის სტატუსის მინიჭების შესახებ გადაწყვეტილება უნდა მიიღონ, გავაგრძელოთ პროგრესი რეფორმების დღის წესრიგის მიმართულებით. შესაბამისად, ეს იყო ჩვენი განხილვის მთავარი მიზანი. არამარტო 15 დეკემბრამდე, ჩვენ ვისაუბრეთ მომავალი წლის დღის წესრიგზეც, როგორ უნდა გადავდგათ კონკრეტული ნაბიჯები, რათა საქართველომ განაგრძოს რეფორმების იმპლემენტაცია. ეს არის ჩვენი ხელისუფლების, მთავრობის გრძელვადიანი პასუხისმგებლობა, რომელიც აღებული აქვს პარტნიორებთან, რათა საქართველო ევროპული ოჯახის ღირსეული წევრი გახდეს და მაქსიმალურად მოხდეს ჩვენი ქვეყნის როგორც საკანონმდებლო, ისე ინსტიტუციური დაახლოება ევროპულ ოჯახთან", - განაცხადა ილია დარჩიაშვილმა.

საქართველოს პრემიერ-მინისტრ ირაკლი ღარიბაშვილის ხელმძღვანელობით მთავრობის ადმინისტრაციაში ევროინტეგრაციის კომისიის სხდომა გაიმართა.

8 ნოემბერს, ევროკომისიამ საქართველოსთვის კანდიდატის სტატუსის მინიჭების რეკომენდაცია გასცა. რეკომენდაციები ევროპულ საბჭოს გადაეგზავნება. ლიდერები საბოლოო გადაწყვეტილებას, დეკემბერში მიიღებენ.