ვიმედოვნებთ, რომ ჩვენს მძევლებს დავაბრუნებთ, თუმცა არის გამოწვევები, - განაცხადა ისრაელის პრემიერ-მინისტრმა, ბენიამინ ნეთანიაჰუმ ბრიტანეთის საგარეო საქმეთა მინისტრთან, დევიდ კემერონთან შეხვედრის დროს.
მანამდე ცნობილი გახდა, რომ „ჰამასმა" ისრაელთან მოლაპარაკებებში დამატებითი მოთხოვნები წამოაყენა, რის გამოც ზავის ამოქმედება გადაიდო.
"[პროცესი] გამოწვევების გარეშე არ მიმდინარეობს, მაგრამ ვიმედოვნებთ, რომ მძევლების პირველი ნაწილის გამოყვანა მოხერხდება და შემდეგ ჩვენი მიზანი ყველა მძევლის გათავისუფლებაა", - აღნიშნა ისრაელის მთავრობის მეთაურმა.
ისრაელი 50 მძევლის გათავისუფლების სანაცვლოდ, 4-დღიან ზავს დათანხმდა. შეთანხმების მიხედვით, „ჰამასი" 7 ოქტომბერს მძევლად აყვანილ 50 ისრაელელს, მხოლოდ სამოქალაქო პირებს - ქალებსა და ბავშვებს გაათავისუფლებს. სანაცვლოდ ისრაელი ღაზის სექტორში ცეცხლის 4 დღით შეწყვეტას დათანხმდა, პარალელურად კი, ციხიდან 150 -მდე პალესტინელ პატიმარს, ძირითადად ქალებსა და მოზარდებს გაათავისუფლებს.
შეთანხმება დღეს დილის 10:00 საათზე უნდა ამოქმედებულიყო, თუმცა გარკვეული პირობების გამო მისი ამოქმედება გადაიდო. მოგვიანებით კატარმა, როგორც შუამავალმა ქვეყანამ, განაცხადა, რომ ზავის ამოქმედების ზუსტი დრო უახლოეს საათებში გამოცხადდება.