საპარლამენტო უმრავლესობის წევრმა, ალუდა ღუდუშაურმა ჟურნალისტებთან „ნაციონალურ მოძრაობაში“ არსებულ დაპირისპირებაზე ისაუბრა და აღნიშნა, რომ პარტია დასასრულის აქტიურ რეჟიმშია გადასული.
„დღეს, „ნაციონალურ მოძრაობაში“ მწუხარების ჟამია. ყველასთვის ცნობილია, რომ პარტია დასასრულის აქტიურ რეჟიმშია გადასული. ამით პირველ რიგში სარგებელს მიიღებს საქართველო და ქართველი ხალხი, რადგან „ნაციონალური მოძრაობა“ აგებულია ბოროტებასა და მერკანტილურ იდეებზე“, - აღნიშნა ალუდა ღუდუშაურმა.
ვიდრე მელია - ხაბეიშვილის დაპირისპირების ფინალი გაირკვევა, მანამდე ორად გაყოფილ პარტიაში ვითარება კიდევ უფრო მწვავდება. ირკვევა, რომ ყოფილი თავმჯდომარე ერთადერთი არ არის, რომელსაც ხაბეიშვილის მმართველობა არ მოსწონს. ლევან ხაბეიშვილის თანამდებობიდან წასვლას, ამჯერად უკვე გიორგი მუმლაძე ითხოვს, ის მოქმედ თავმჯდომარეს ღიად დაუპირისპირდა.