პირადი ცხოვრების ხელყოფის ფაქტზე დაკავებულია 37 წლის კაცი - სპეციალური საგამოძიებო სამსახურის ცნობით,მან ყოფილ მეუღლეს მობილური წართვა და საკუთარ ტელეფონში მისი ინტიმური შინაარსის ფოტოები გადაიტანა. საბოლოოდ კი შურისძიების მოტივით, ისინი დაზარალებულის ნათესავებს გაუგზავნა.
"გამოძიებით დადგინდა, რომ ახალციხის მუნიციპალიტეტში მცხოვრებმა, 1987 წელს დაბადებულმა ბრალდებულმა ო.ა.-მა, ყოფილ მეუღლეს მობილური ტელეფონი წაართვა, და საკუთარ მობილურ ტელეფონში დაზარალებულის პირადი ცხოვრების ამსახველი ინტიმური შინაარსის ფოტოები გადაიტანა. აღნიშნულის შემდეგ, ყოფილ მეუღლესთან უთანხმოების გამო, შურისძიების მოტივით ინტიმური შინაარსის ფოტოები დაზარალებულის ნათესავებს "whatsapp"- ის საშუალებით გადაუგზავნა.
საგამოძიებო მოქმედებების ჩატარების შედეგად, სპეციალურმა საგამოძიებო სამსახურმა ბრალდებული ო.ა. დააკავა და მას ბრალდება გენდერის ნიშნით შეუწყნარებლობის მოტივით ჩადენილი პირადი ცხოვრების საიდუმლოს ხელყოფისთვის წარედგინა", - ვკითხულობთ განცხადებაში.
დანაშაული 7 წლამდე თავისუფლების აღკვეთას ითვალისწინებს.