პარტია „ლელოში“ ამერიკელ პიარკონსულტანტ ჯერემი როზნერთან თანამშრომლობას ადასტურებენ. როგორც „ლელოს“ პოლიტსაბჭოს წევრმა, გრიგოლ გეგელიამ განაცხადა, ჯერემი როზნერი გამოცდილი, მაღალი დონის პროფესიონალია და მოხარული არიან, რომ ასეთი მრჩეველი ჰყავთ.

„ბუნებრივია, ვთანამშრომლობთ არაერთ ტოპ წამყვან კონსულტანტთან, მათ შორის ერთ-ერთი არის ჯერემი როზნერი. ჩვენთვის დიდი პატივი, სიხარულია, რომ ასეთი მრჩეველი გვყავს“, – განაცხადა გრიგოლ გეგელიამ.

კითხვაზე, როდის დაიწყეს ჯერემი როზნერთან თანამშრომლობა, გრიგოლ გეგელიამ აღნიშნა, რომ ასეთი დეტალები საინტერესო არ არის. „ეს არის ისეთი ტიპის დეტალები, რომლებიც, არ მგონია, ვინმესთვის საინტერესო იყოს“, – განაცხადა გრიგოლ გეგელიამ.

კიდევ ერთ კითხვაზე, რატომ თანამშრომლობენ მაინცდამაინც „ნაციონალური მოძრაობის“ ყოფილ პიარკონსულტანტთან, გეგელიამ აღნიშნა:

„ჯერემი როზნერს ფართო გამოცდილება აქვს სხვადასხვა სახელმწიფოში. სწორედ ამიტომ არის მნიშვნელოვანი და კარგი პარტნიორი ჩვენთვის, როგორც გამარჯვებით დაინტერესებული პოლიტიკური ძალისთვის. მე და „ნაციონალური მოძრაობის“ წევრი ერთ ექიმთან რომ დავდიოდეთ, ეს რაიმე პოლიტიკურ მსგავსებაზე მიუთითებს, თუ იმაზე, რომ ექიმი არის კარგი. რაც შეეხება თანამშრომლობას,  ყველაფერი არის ნათელი, მარტივია, თუ წარსულში 12, 15 და 20 წლის წინ, ხსენებული კონსულტანტი ვინმესთან თანამშრომლობდა, ეს საერთოდ არ არის არსებითი დღეს, 2024 წელს, როცა ის თანამშრომლობს ჩვენთან, „ლელოსთან“. ჩვენ გვაქვს დამოუკიდებელი დღის წესრიგი და მჭიდრო კავშირში ვართ ტოპ კონსულტანტებთან, მათ შორის არის ჯერემი როზნერი“, – განაცხადა გრიგოლ გეგელიამ.

მანამდე „ლელოს“ წევრმა, დავით უსუფაშვილმა მედიის წარმომადგენლებს განუცხადა, რომ როგორც მმართველ პარტიას, ისე ჰყავს ოპოზიციურ პარტიებს საერთაშორისო კონსულტანტები.