სახელი*
    ელ–ფოსტა
    წერილის ტექსტი*
    საკონტროლო კოდი* კოდის განახლება
    გაგზავნა
    ნინო მიქიაშვილი
    15.03.2019

     საფრანგეთის პატარა ქალაქ არლში ფიროსმანის ნამუშევრების გამოფენის ირგვლივ "რეზონანსი" კინორეჟისორ გიორგი შენგელაიას ესაუბრა. იგი საფრანგეთიდან ახლახან დაბრუნდა.

    გიორგი შენგელაია: 2019 წლის 1 მარტიდან არლში, ვან გოგის მუზეუმში ფიროსმანის ნამუშევრებია გამოფენილი. ამ ფაქტს ჩვენი მედიასაშუალებები ისე აშუქებენ, რომ ფიროსმანის ნამუშევრები ვან გოგთან ერთადააა გამოფენილი. არადა, სინამდვილეში, ვან გოგის მხოლოდ ერთი ნამუშევარია იქ და ისიც ცალკე დარბაზში და არა ფიროსმანის 29 ორიგინალთან ერთად.

    მოგეხსენებათ, რომ ფიროსმანის ნამუშევრები არლში ვენიდან გადაიტანეს, სადაც სამი თვის განმავლობაში ალბერტინას მუზეუმში იყო გამოფენილი. ამ გამოფენების კურატორმა მითხრა, რომ ფიროსმანის ნამუშევრები ვან გოგის მუზეუმიდან ვაშინგტონში მიაქვს.

    "რეზონანსი": როგორ გამოიყურება არლში ვან გოგის მუზეუმი, რომელსაც სულ 5 წლის ისტორია აქვს?

    გ.შ: ძალიან მოკრძალებული შენობაა. იქიდან ახლოს არის ვან გოგის მემორიალური ბინა, ერთი პატარა ოთახი, რომელშიც მხატვარმა თავისი ცხოვრების გარკვეული პერიოდი გაატარა.

    "რ": თქვენ როგორ აღმოჩნდით არლში, ფიროსმანის ნამუშევრების გამოფენაზე?

    გ.შ: ფრანგებმა მიმიწვიეს. ფიროსმანის შესახებ ჩემი ფილმი, ისევე, როგორც ფიროსმანის ნახატები, რაც დრო გადის მით უფრო საინტერესო ხდება. საერთოდ, კარგი ხელოვნების ნაწარმოებს უნდა დრო, რომ ხალხმა სათანადოდ გაიგოს და აღიქვას. უცხოეთიდან იმ ფონდის ხელმძღვანელმა დამირეკა, რომელმაც არლში ფიროსმანის ნახატების გამოფენა მოაწყო. ფონდის ხელმძღვანელმა მითხრა, თქვენი ფილმი ადრე ნანახი მქონდა, მაგრამ ახლა ხელმეორედ ვნახე და აღფრთოვანებული ვარო.

    გამოფენის ორგანიზატორი მხარის თხოვნით ფილმს ფრანგული სუბტიტრები გავუკეთეთ. ფილმი აჩვენეს მუზეუმის პატარა დარბაზში, ხოლო ქალაქ არლის კინოთეატრში ივნისიდან აჩვენებენ.

    "რ": რატომ დამალეს ის ფაქტი, თქვენი ფილმის ჩვენებაც რომ მოეწყო, გამოფენის პარალელურად?

    გ.შ: აქედან იქ ტელევიზიები ჩასულები არ ყოფილან; არლში გამართულ ღონისძიებას ვიდეოკამერით იღებდა საქართველოს კულტურის სამინისტროდან ჩასული ქალბატონი და შემდეგ მისი გადაღებული კადრები დაურიგეს ქართულ ტელეარხებს.

    "რ": არლში თქვენი კომენტარი არ ჩაუწერიათ?

    გ.შ: ჩემი კომენტარი ჩაიწერეს, მაგრამ არ აჩვენეს, რადგან მათთვის საამებელი არაფერი მითქვამს; ამ უწყების მინისტრიდან დაწყებული, ყველას გადავუარე.

    "რ": ვის გულისხმობთ, კულტურის ფაქტობრივ მინისტრ მიხეილ გიორგაძეს?

    გ.შ: დიახ და დავით ლორთქიფანიძეს, ეროვნული მუზეუმის დირექტორს, რომელიც ასევე იმყოფებოდა გამოფენის გახსნაზე. მუზეუმის შენობაში რომ შემოვიდნენ, დაახლოებით 30-კაციანი ამალა ახლდათ. მეგონა, მათ შორის ხელოვნების სფეროს წარმომადგენლებს ვნახავდი, მაგრამ ვერავინ ვიცანი. სავახშმოდ რომ დავსხედით, ჩემს მაგიდასთან ახალგაზრდა წყვილი აღმოჩნდა, დავით ლორთქიფანიძის ქალიშვილი და სიძე.

    "რ": და ბოლოს, ამბობთ, რომ გინდათ, ჩვენი გაზეთის საშუალებით ხელისუფლებისა და საზოგადოების იმ ნაწილს მიმართოთ, ვინც სკოლაში სექსუალური აღზრდის შეტანის მომხრეა (რესპონდენტმა გვთხოვა, ჩვენი გაზეთის საშუალებით საზოგადოებისა და ხელისუფლების ყურამდე მიგვეტანა ამის შესახებ მისი პოზიცია).

    გ.შ: სკოლაში სექსუალური აღზრდის შეტანა დაუშვებელია. ამ მხრივ თუ რაიმე პრობლემა წარმოიშვება, მშობლებმა, ოჯახმა უნდა იზრუნოს. ამის მომხრეებს არაფერი სერიოზული არგუმენტი არა აქვთ, გარდა იმისა, რომ ბავშვს ფიზიოლოგიურ მხარესთან აახლოებენ და მის სულიერებაზე საერთოდ არ ფიქრობენ, რაც მომავალში ბავშვზე ძალიან უარყოფით კვალს დატოვებს. სკოლებში ასეთი საგნის შეტანა ამ იდიოტური ლიბერალიზმის მონაპოვარია - ჩვენ ახლა ვცდილობთ იმის დანერგვას, რაც დასავლეთში უკვე კვდომას იწყებს.

    ლიცენზია
    დატოვე კომენტარიკომენტარები (0)
    ჩაწერა სახელი

    Copyright © 2006-2019 by Resonance ltd. . All rights reserved
    ×