შარტავას ქუჩაზე მომხდარი ავტოსაგზაო შემთხვევის შემდეგ, 8 წლის დათი ქოქრაშვილის ჯანმრთელობის მდგომარეობა საბედნიეროდ, უკეთესობისკენ იცვლება. დათის მამა ირაკლი ქოქრაშვილი „სარკეს“ შვილის ამჟამინდელ მდგომარეობაზე უყვება.

„ჯერ კიდევ აწუხებს ტკივილები. ნელ-ნელა კი მივდივართ რეაბილიტაციისკენ, მაგრამ ჯერ იმდენი რამ არის მოსაგვარებელი. … მთავარია, შეჩერებულია ინფექციები და ბედნიერები ვართ, ამით. ჭრილობაზე კანი გადანერგეს, რომ შეხორცებულიყო, მაგრამ არ მიიღო ორგანიზმმა, დაიშალა და მერე სტეროდიებით და რაღაცებით მოხდა დამუშავება. შეხორცებული ჯერ კიდევ არ არის და ამას ველოდებით. 

ეს კანი პირდაპირ არის გადაკრული სარდის ბუშტსა და სხვა ორგანოებზე. ქსოვილი სულ აღარის ამ ადგილებში და ამიტომ სტკივა. ვერც ვსვამთ. ხუთჯერ შევეცადეთ, ძლიერი ტკივილგამაყუჩებლების ფონზე დაგვესვა ეტლზე, მაგრამ იმდენად თხელი ფენაა კანი, თუნდაც კუდუსუნის ძვალზე, რომ დიდი ტკივილი აქვს. კანი, ფაქტობრივად, ძვალსა და ორგანოებზეა გადაკრული, ძალიან სტკივა. სპეციალური გასაბერი ბალიშიც ვუყიდეთ, მაგრამ…“ – ამბობს ირაკლი ქოქრაშვილი.

დათის მამა ასევე ჰყვება, რომ კლინიკაში გაოცებულები არიან ექიმები, რომ ასე წავიდა ყველაფერი. ხშირად მოდიოდნენ კლინიკაში მოძღვრები. ლოცულობდნენ.

„ყოველდღიურად ლოცულობდნენ დათის გამო და გვაძლიერებდნენ. ქართველები, საელჩო, ელჩი, კონსული ისე გვედგნენ გვერდით. კონსული დავით ჩაჩავა ყოველდღე აქ იყო. ასევე ელჩი ლაშა ჟვანია. წარმოუდგენელი სიტუაციიდან გამოვედით. აქ წერენ, რომ სასწაული მოხდა, რადგან ასეთი შემთხვევა ძალიან  იშვიათია. თავიდან მეილები რომ გავაგზავნეთ, ასე მდგომარეობაშია ბავშვი-მეთქი, ყველა მისამძიმრებდა. აქაც მეუბნებოდნენ, დღევანდელი დღით იყავი კმაყოფილიო. იმედი არავის ჰქონდა, რომ გადარჩებოდა. რაც საქართველოში გააკეთეს ქართველმა ქირურგებმა, ნამდვილი სასწაული იყო! აქაურ ექიმებს ყბა ჩამოუვარდათ – სასწაული ოპერაცია იყო ჩატარებული. აქ რაც მოხდა, ხომ საერთოდ სასწაული იყო… თავიდან ბოლომდე გაწერილი მგონია ეს ყველაფერი უფლისგან, რომ ასე უნდა ყოფილიყო. ალბათ ისიც გაწერილია, რომ ეს ბავშვი ფეხზე დადგება და გაივლის“, – ამბობს დათის მამა „სარკესთან“ საუბარში.

სტატიების ნახვა შეგიძლიათ რუბრიკაში "ყველა სტატია"

ყველა ახალი ამბის ნახვა შეგიძლიათ ამ ბმულზე

საინტერესო ვიდეოები შეგიძლიათ იხილოთ რუბრიკაში "ყველა ვიდეო"

ბოლო ამბების ნახვა შეგიძლიათ ამ ბმულზე