აშშ-ის პრეზიდენტმა დონალდ ტრამპმა ვაშინგტონში უკრაინის პრეზიდენტ ვოლოდიმირ ზელენსკისთან შეხვედრის შემდეგ მიანიშნა, რომ რუსეთ-უკრაინის ახალი საზღვარი, შესაძლოა, ამჟამინდელი ფრონტის ხაზის გასწვრივ დაფიქსირდეს, რადგან „საზღვრები განისაზღვრა ომით და გამბედაობით". ზელენსკი ფრონტის „გაყინვას" ეთანხმება. რუსეთის პოლიზიცია კი უახლოეს ორ კვირაში გაირკვევა, როდესაც ტრამპი რუსეთის პრეზიდენტ ვლადიმირ პუტინს შეხვდება.

„ოცნების" მთავრობა თავის ყოფილი ლიდერების წინააღმდეგ საქმე იწყებს - სამიზნეებს შორის არიან ექსპრემიერი ირაკლი ღარიბაშვილი, სუს-ის ყოფილი უფროსი გრიგოლ ლილუაშვილი, ყოფილი მთავარი პროკურორი ოთარ ფარცხალაძე და მათთან დაკავშირებული, სულ რვა პირი. მათი საცხოვრებელი ბინების, სახლების და პირადი ჩხრეკები ჩატარდა, საიდანაც, პროკურატურის მტკიცებით, ამოღებულია დიდი რაოდენობის ფული და ტექნიკა.

4 ოქტომბრის მოვლენებზე დაკავებები კვლავ განახლდა, პარასკევს გამთენიისას კიდევ სავარაუდოდ ცხრამდე აქტივისტი აიყვანეს. ოფიციალური განმარტებები შსს-ს არ გაუკეთებია, თუმცა სავარაუდოდ დაკავებულებს იმ მუხლებს ედავებიან, რომლებითაც ათონელის რეზიდენციასთან მომხდარზე უწყებამ აღძრა საქმე.

მმართველი პარტია ოპოზიციური პარტიების ნაწილის აკრძალვას აანონსებს და ამ მიზნით, საკონსტიტუციო სასამართლოში სარჩელის შეტანას გეგმავს. რამდენიმე დღეში გახდება ცნობილი, ვინ შედის „რადიკალურ ოპოზიციაში", რომლებიც პოლიტიკურ საქმიანობას ვეღარ გააგრძელებენ. ანალიტიკოსები „რეზონანსთან" საუბარში „ნაცმოძრაობისა" და „კოალიცია ცვლილებებისთვის" გარდა, სხვა პარტიებსაც მოიაზრებენ.

აშშ-ისა და რუსეთის პრეზიდენტები უკრაინის საკითხზე მომდევნო სამიტის ჩატარებაზე შეთანხმდნენ. შეხვედრა შესაძლოა მომდევნო ორ კვირაში უნგრეთში გაიმართოს. ამ სიურპრიზმა უკრაინას დაადასტურა, რომ მოსკოვი მზადაა დიპლომატიური მოლაპარაკებებისთვის, თუმცა უსაფრთხოების რისკები და ენერგეტიკულ ინფრასტრუქტურაზე დარტყმები ისევ გრძელდება.

საქართველოს ტექნიკური უნივერსიტეტის რექტორმა, დავით გურგენიძემ, პროკურატურას მიმართა მოთხოვნით, დაეყადაღებინათ უნივერსიტეტის ის ქონება, რომელიც მისი თქმით, მესამე პრეზიდენტის ოჯახის მიერ წინა ხელისუფლების პერიოდში მიტაცდა.მმართველ გუნდში აცხადებენ, რომ ამ ქეისის შესწავლა საინტერესო იქნება.

მთავრობა განათლების სისტემის ძირეულ რეფორმას აანონსებს, პრემიერი ამბობს, რომ სკოლებში სწავლება ისევ 11-წლიანი უნდა გახდეს, უნივერსიტეტები 3+1 სისტემაზე გადავლენ, რაც 3-წლიან ბაკალავრიატს და 1-წლიან მაგისტრატურას ითვალისწინებს (გარდა მედიცინისა).

ქართველი მძღოლებისა და სატრანსპორტო საშუალებებისთვის რუსეთში ახალი შეზღუდვა ამოქმედდა. კერძოდ, აქამდე მოქმედი 180 დღის ნაცვლად, მძღოლებს რუსეთის ტერიტორიაზე ყოფნის ვადად 90 დღე განესაზღვრათ. სპეციალისტების მტკიცებით, ეს დრო მძღოლებისთვის საკმარისი არ არის. სავარაუდოდ, ახალი რეგულაციის შედეგად, ქართველი მძღოლები და სატრანსპორტო საშუალებები, რუსეთის მოქალაქე მძღოლებით, ასევე - რუსული სატრანსპორტო საშუალებებით ჩანაცვლდებიან. თავის მხრივ, ეს ექსპორტ-იმპორტსაც გააძვირებს და სურსათსაც. 

გურამ შარაძე 17 ოქტომბერს 85 წლის გახდებოდა... ამ დღეს საქართველოს მეცნიერებათა ეროვნულ აკადემიაში მისი ხსოვნისადმი მიძღვნილი საღამო გაიმართება. არადა, ბატონი გურამი „ხულიგნობისთვისაც" რამდენჯერმე იყო დაპატიმრებული...

ოპოზიციაში ამბობენ, რომ „ოცნება" ნეიტრალური სტატუსის გამოცხადებისთვის ემზადება და ამისთვის არ გამორიცხავენ, რომ ახალი ვადამდელი საპარლამენტო არჩევნები ჩანიშნოს, რეფერენდუმთან ერთად, და საკონსტიტუციო უმრავლესობის მოპოვების შემდგომ, 78-ე მუხლი ამოიღოს კონსტიტუციიდან.

პოლიტილოგ იგორ კვესელავას მიჩნია, რომ ოპოზიციის წამყვან ფიგურებს ყავლი გაუვიდათ და უკვე არ ძალუძთ პოლიტიკური ბრძოლის სათანადო რეჟიმში წარმართვა. ფიქრობს, რომ ახალი ლიდერები აუცილებლად გამოჩნდებიან და ერთ-ერთ ასეთად ბიძინა ივანიშვილის ყოფილ ადვოკატ ვიქტორ ყიფიანს თვლის. „შეიძლება ეს იყოს სწორედ ის ახალი ძალა, რომელსაც ველოდით - ცეცხლი უკვე დანთებულია და მთავარია ხანძარში არ გადაიზარდოს," - აცხადებს პოლიტოლოგი.

აშშ-ს მიერ უკრაინისთვის „ტომაჰავკების" გადაცემა ისევ მსოფლიო ყურადღების ეპიცენტრშია. კრემლის მოკავშირე ბელარუსის ლიდერი ბირთვული ომის საფრთხეზე საუბრობს და აშშ-ს მოუწოდებს, უკრაინას რაკეტები არ გადასცეს. ოფიციალური კიევი ამ ნაბიჯს ომის დასასრულის დასაწყისად მიიჩნევს, იმედოვნებს, რომ დამატებითი შეიარაღება კრემლზე ზეწოლას გაზრდის.