სტრატეგიული პარტნიორები ერთმანეთში ჯერ ცვლიან ინფორმაციას და შემდგომ ხდება ამ გაცვლილი ინფორმაციის საფუძველზე რაღაც სახის საჯარო კომუნიკაცია, - ამის შესახებ დავით მათიკაშვილმა „ქრონიკაში" ქართველი მოსამართლეების დასანქცირებაზე საუბრისას განაცხადა. საპარლამენტო უმრავლესობის წევრის თქმით, წყაროს, რომელმაც ამერიკის სახელმწიფო დეპარტამენტს მოსამართლეების კორუმპირებულობის შესახებ ინფორმაცია მიაწოდა, არ სურს, რომ საქართველოს აშშ-სთან ურთიერთობა ჰქონდეს მაღალ ნიშნულზე და ქვეყანამ ევროკავშირის წევრობის კანდიდატის სტატუსი მიიღოს.
„ამის არარსებობა არამხოლოდ დიპლომატიური შიგთავსის ნაკლებობაზე, მეტყველებს იმაზე, რომ წყაროს, რომელსაც სახელმწიფო დეპარტამენტი დაეყრდნო, ნამდვილად არ სურს არც ამერიკა-საქართველოს ურთიერთობის მაღალ ნიშნულზე ყოფნა, და რაც ყველაზე მთავარია, ამ წყაროს არაფრით არ სურს, რომ საქართველომ მიიღოს კანდიდატის სტატუსი 12-პუნქტიანი გეგმის შესრულების კუთხით. სახელმწიფო დეპარტამენტის ეს განცხადება დეპოლარიზაციას ხელს რომ ვერ შეუწყობს საქართველოში, ცხადზე ცხადია. თითქოს, სახელმწიფო დეპარტამენტის წყაროს სურვილი და მიზანი არის ეს - პოლარიზაციის გაღრმავება და საქართველოს მეტად დაშორება სტატუსის მინიჭებისგან, რამაც შეიძლება შემდგომში რაღაც საფუძველი მისცეს გარკვეულ ძალებს, რომ აქტიური მოქმედებები დაიწყონ საქართველოს ხელისუფლების წინააღმდეგ", - განაცხადა მათიკაშვილმა.
აშშ-ის სახელმწიფო მდივნის, ენტონი ბლინკენის განცხადებით, აშშ-მა მოსამართლეებს მიხეილ ჩინჩალაძეს, ლევან მურუსიძეს, ირაკლი შენგელიასა და ვალერიან ცერცვაძეს, მნიშვნელოვან კორუფციულ საქმიანობაში მათი ჩართულობის მოტივით, სანქციები დაუწესა.