"ტაბულას" დამფუძნებელი, თამარ ჩერგოლეიშვილი სოციალურ ქსელში წერს, რომ "ფორმულას" დამფუძნებელი, დავით კეზერაშვილი პოლიტიკიდან უნდა წავიდეს.

"კეზერაშვილი "ფორმულას" წილებს ვის გადაუფორმებს მისი და "ფორმულას" თანამშრომლების კომფორტის საქმეა.

ის პოლიტიკიდან უნდა გაიწიოს და პოლიტიკის ოლიგარქიულ დარასკლადებას შეეშვას - მისი საქმე არ არის პოლიტიკური ფიგურების გაწევ-გამოწევა! არც სპიკერების გადარჩევა! არც ალიანსების კეთება!

მისი "ჯანსაღი რჩევების" ადგილი ქართულ პოლიტიკაში აღარ უნდა იყოს.

ამას ფორმულას წილების გადაფორმება არ უშველის", - წერს ჩერგოლეიშვილი.

"ფორმულას" დამფუძნებელი, დავით კეზერაშვილი ე.წ. ქოლცენტრების საქმეზე BBC-ის გამოძიებას ეხმაურება და აცხადებს, რომ ტელეკომპანიის საკონტროლო პაკეტზე უარს ამბობს.

"მრავალი წელია მეც და ჩემს ოჯახსაც არაერთხელ გვიფიქრია, ხომ არ ჯობს, თავი დავანებოთ ბრძოლას და მშვიდი რეჟიმით ვიცხოვროთ, რამდენად ეს შესაძლებელია იძულებით ემიგრაციაში. ამ დღეებში ეს საკითხი კიდევ ერთხელ გახდა ჩვენთვის აქტუალური, მაგრამ როგორც კი მსგავს პერსპექტივას ვუშვებთ, მაშინვე ვგრძნობთ პასუხისმგებლობას.

როგორ შეიძლება, ვდისტანცირდე ყველაფრისგან მაშინ, როდესაც შემიძლია თუნდაც ერთი აგური დავდო რუსული ოლიგარქიის წინააღმდეგ ბრძოლაში. ამიტომ ვაცხადებ, რომ ჩემ ირგვლივ შექმნილი მძიმე გარემოს მიუხედავად, პროცესებიდან ჩემი გასვლა არ განიხილება. თუმცა ვიღებ გადაწყვეტილებას ჩემი დახმარების პარალელურად ტელეკომპანია ფორმულას მივცე სრულიად ახალი და გამოცდილებით უნიკალური მედია-მოდელის შექმნის შესაძლებლობა, რომელიც კიდევ უფრო მაღლა აწევს მისი სარედაქციო დამოუკიდებლობის თამასას, მათ შორი ჩემგანაც (რისი დეფიციტიც არხს არც ამ დრომდე ჰქონია).

გადაწყვეტილება ასეთია: მე უარს ვამბობ ფორმულას საკონტროლო პაკეტზე და არსებული წილის ნახევარს ახლავე გადავცემ ტელეკომპანიის კოლექტივს. მას შემდეგ კი, რაც დასრულდება ოლიგარქიული მმართველობა, ფორმულას კოლექტივსვე სრულად გადავცემ ჩემს დარჩენილი წილსაც. ივანიშვილის ფაქტორის გაქრობისა და დასავლურ სივრცეში საბოლოოდ შესვლის შემდეგ, დარწმუნებული ვარ თავისუფალ მედიას ჩემი მონაწილეობის გარეშეც გაუჩნდება ბევრი სხვა საარსებო წყარო და აქ დაესმება წერტილი ჩემს აქტივობას მედიის მხარდაჭერის მიმართულებით და ზოგადად, ყველა ტიპის ჩართულობას ქართული პოლიტიკაში", - წერია დავით კეზერაშვილის განცხადებაში.

ცნობისთვის, BBC-იმ გამოაქვეყნა საკუთარი გამოძიება, სადაც მილიარდ დოლარიან თაღლითურ სქემასთან დაკავშირებით, დავით კეზერაშვილია მოხსენიებული.