გარდაბნის მუნიციპალიტეტის სოფელ ახალსოფელში მომხდარი მკვლელობა საზოგადოებისთვის ცნობილია. უმძიმესი ფაქტი 11 მაისს მოხდა, კონფლიქტის დროს 21 წლის ბიჭმა დანით 50 წლის მამა მოკლა. ბრალდებული კახა კობახიძე ძალოვნებმა იგი იმავე დღეს დააკავეს და მას მამის განზრახ მკვლელობაში დასდეს ბრალი.
როგორც ბრალდებულის დედა ამბობს, მისი მეუღლე ოჯახზე მუდმივად ფიზიკურად ძალადობდა. ნათია ჩაბრუდაშვილის თქმით, ერთ-ერთი ასეთი შემთხვევის დროს მოხდა დანაშაულიც, როცა მის გადასარჩენად შვილმა მკვლელობა ჩაიდინა.
„ჩემი შვილი იყო უდანაშაულო. ეს იყო თავდაცვისთვის გაკეთებული დანაშაული. ასე რომ არ მომხდარიყო იქნებოდა არა ერთი გვამი, არამედ - სამი.
დანით დამდევდა, ამ დროს ჩემი შვილი შემოვარდა, ცდილობდა ამ უბედურების თავიდან აცილებას, მაგრამ ვერ შეაკავა. დანა წაართვა და ეს უბედურება დატრიალდა ჩემი და ჩემი შვილის თავს, რომელსაც უვადო პატიმრობა ემუქრება.
იმ დღეს, როცა ეს მოხდა, ჩემი მეუღლე გასვენებიდან ნასვამი დაბრუნდა, ნაჯახით დალეწა სამზარეულო, შემდეგ მე გამომეკიდა. მეზობელთან შევარდი, მაგრამ ძალით წამომიყვანა. რომ მოვედით სახლში, ანალოგიური განაგრძო. რაც სახლში მოხვდა, დაგვიშინა. გვაგინებდა, თმებში გვწვდა. კახა ეხვეწებოდა გაუშვიო. არ მიშვებდა. შემდეგ მოხდა ის, რაც მოხდა" - ჰყვება მოკლულის მეუღლე "ტვ პირველთან" საუბრისას.