ევროკავშირმა განვითარებადი ქვეყნები გააფრთხილა, რომ რუსეთი მათ იაფ მარცვლეულს ახალი დამოკიდებულების შესაქმნელად სთავაზობს. ინფორმაციას ამის შესახებ სააგენტო Reuters-ი ავრცელებს.
როგორც საინფორმაციო სააგენტო Reuters-ი იუწყება, საგარეო პოლიტიკისა და უსაფრთხოების საკითხებში ევროკავშირის უმაღლესმა წარმომადგენელმა, ჟოზეფ ბორელმა ორშაბათს წერილობით მიმართა განვითარებად და G20-ის ქვეყნებს და მოუწოდა მათ, ისაუბრონ მკაფიო და ერთიანი ხმით, რათა მოსკოვს უბიძგონ, დაბრუნდეს შავი ზღვის მარცვლეულის შეთანხმებაში.
„როდესაც მსოფლიო შეფერხებული მიწოდებისა და [სურსათზე] მაღალი ფასების წინაშე დგას, რუსეთი ახლა მიმართავს დაუცველ ქვეყნებს შეღავათიან ფასებში მარცვლეულის გადაზიდვის ორმხრივი შეთავაზებებით და თითქოს თავად მოაგვარებს პრობლემას", - განაცხადა ბორელმა.
„ეს ახალი დამოკიდებულების შესაქმნელად საკვების მიზანმიმართულად იარაღად გამოყენების ცინიკური პოლიტიკაა, რაც ეკონომიკურ დაუცველობასა და გლობალურ სასურსათო უსაფრთხოებას ამწვავებს", - დასძინა მან.