ისრაელმა ღაზაში ქალებისა და ბავშვების დაბომბვა უნდა შეწყვიტოს, - ამის შესახებ საფრანგეთის პრეზიდენტმა, ემანუელ მაკრონმა BBC-ისთან ინტერვიუში განაცხადა.
„დღეს, დე ფაქტო, მშვიდობიანი მოქალაქეები იბომბებიან. ბავშვები, ქალები, მოხუცები იბომბებიან და იხოცებიან. ამის არანაირი საფუძველი და გამართლება არ არსებობს. ამიტომ, ჩვენ მოვუწოდებთ ისრაელს, რომ ეს შეწყვიტოს", - განაცხადა მაკრონმა.
ემანუელ მაკრონმა ხაზგასმით აღნიშნა, რომ საფრანგეთი გმობს „ჰამასის" ტერორისტულ ქმედებებს და იმის მიუხედავად, რომ აღიარებს ისრაელის უფლებას დაიცვას საკუთარი თავი, იგი ისრაელს მოუწოდებს რომ ღაზაში დაბომბვები შეწყვიტოს.
საფრანგეთის პრეზიდენტმა, უარი თქვა პასუხი გაეცა კითხვაზე, არღვევს თუ არა ღაზაში ისრაელი საერთაშორისო სამართალს.
„მე არ ვარ მოსამართლე. მე სახელმწიფოს მეთაური ვარ", - აღნიშნა მაკრონმა.