უკრაინულმა ჯარებმა სამხრეთ ფრონტზე სტარომაიორსკის მიმართულებით წარმატებით  მიაღწიეს და ასევე, წინ მიიწევენ ბახმუტთან. უკრაინის შეიარაღებული ძალები მაგრდებიან მიღწეულ ხაზებზე. ხოლო რუსები ძლიერ წინააღმდეგობას აგრძელებენ და რეზერვებს იყენებენ. უკრაინის თავდაცვის ძალებმა ასევე ბახმუტის მიმართულებით ანდრეევკას მახლობლად მდებარე პოზიციებიდან რუსები უკუაგდეს. 

მას შემდეგ რაც რუსეთმა გასულ კვირას მარცვლეულის შეთანხმება დატოვა, მან უკრაინის საპორტო ქალაქებზე თავდასხმები გააძლიერა. მათ შორის, სასტიკად დაიბომბა ოდესისა და მდინარე დუნაის სანაპიროზე არსებული პორტები. მეტიც, იმუქრება, რომ ჩაძირავს იმ სამოქალაქო გემებსაც შავ ზღვაში, რომლებიც უკრაინული პორტებისკენ მიემართებიან. ამასთან, ბრიტანეთი აცხადებს, რომ შეეცდება, რუსული მხარე მარცვლეულის შეთანხმებაში დააბრუნოს. სამხედრო ექსპერტი ვახტანგ მაისაია ეჭვობს, რომ ბრიტანეთი ამ ამოცანის გადაჭრას შეძლებს და მარცვლეულის ექსპორტის ალტერნატიული გზებზე საუბრობს.

ფრონტზე ბახმუტი კვლავ ერთ-ერთი ცხელი წერტილია. უკრაინელები ქალაქის ჩრდილოეთ და სამხრეთის მიმართულებაზე შეტევითი ოპერაციებს ნელი ტემპით აგრძელებენ, რის შედეგადაც მტერი იძულებული გახდა, რომ რამდენიმე დასახლებაში პოზიციები დაეტოვებინა. როგორც სამხედრო ანალიტიკოსები ამბობენ, თუ ოპერაცია წარმატებით განვითარდა, უკრაინელები ბახმუტში მყოფი რუსული ძალების ალყაში მოქცევას შეძლებენ. ეს ამოცანა აქვთ თავად უკრაინულ სამხედრო ხელმძღვანელობასაც.

უკრაინელებმა, გასული კვირის განმავლობაში, სამხრეთ ფრონტზე 12 კვადრატულ კილომეტრზე მეტი ტერიტორია გაათავისუფლეს, - ამის შესახებ უკრაინის თავდაცვის მინისტრის მოადგილემ, ანა მალიარმა განაცხადა. ამასთან, მისი თქმით, უკრაინელებმა, კონტრშეტევის დაწყებიდან, აღნიშნული მიმართულებით 192 კვადრატულ კილომეტრზე მეტი ტერიტორია გაათავისუფლეს.

ბელარუსის ტერიტორიაზე მყოფი კერძო რუსული სამხედრო კომპანია „ვაგნერის" მებრძოლებს პოლონეთში სურთ „ექსკურსიაზე წასვლა" - ამის შესახებ ნახევრად ხუმრობით განაცხადა ბელარუსის პრეზიდენტმა ალექსანდრ ლუკაშენკომ სანკტ-პეტერბურგში ვლადიმირ პუტინთან გამართულ შეხვედრაზე. ანალიტიკოსთა შეფასებით, ეს არის მინიშნება, რომ რუსეთი დასავლეთის წინააღმდეგ აქტიური მოქმედების დაწყებისთვის ემზადება და ამისთვის სწორედ „ვაგნერელებს" გამოიყენებს.

ხორბლის შეთანხმებიდან გასვლის შემდეგ, რუსები ინტენსიურად ბომბავენ უკრაინულ საპორტო ინფრასტრუქტურას შავ ზღვაზე, განსაკუთრებული სამიზნე ოდესის ოლქია. სამხედრო ანალიტიკოსები არ გამორიცხავენ, რომ რუსეთმა მუქარა შეასრულოს და სავაჭრო გემებზეც მიიტანოს იერიში.

რუსეთში სამართალდამცავებმა დააკავეს 2014 წელს დონბასის ომში სეპარატისტების ლიდერი, ჰააგის სასამართლოს მიერ უვადო პატიმრობამისჯილი იგორ სტრელკოვი (გირკინი), რომელიც ბოლო ხანს რუსეთის ხელისუფლებასაც აკრიტიკებდა და კერძო სამხედრო კომპანია „ვაგნერსაც". რუსულ მედიაში გავრცელებული ცნობების თანახმად, გირკინი სავარაუდოდ სწორედ „ვაგნერის" ყოფილი თანამშრომლის განცხადების საფუძველზე დააკავეს და ბრალი წარუდგინეს ექსტრემიზმში. იგი უკრაინის ომში რადიკალური მეთოდების გამოყენებას უჭერდა მხარს და საზოგადოების ნაწილში სერიოზული მხარდაჭერით სარგებლობდა.

ნაკლებად წარმატებულ კონტრშეტევას უკრაინაში და მის ფარგლებს გარეთ ბევრი ჰაერში რუსების უპირობო უპირატესობას უკავშირებს. უკრაინა უკვე დიდი ხანია ძველი ამერიკული მულტიფუნქციური თვითმფრინავების, ეფ-16-ების გადაცემას ითხოვს, თუმცა, სხვადასხვა მიზეზის გამო, ამერიკა ამისგან აქამდე თავს იკავებდა-ხოლმე. ახლა, როგორც ჩანს, სიტუაცია შეიცვალა, ნახეს რა ვაშინგტონსა და ევროპულ დედაქალაქებში, რა კოლოსალური ზიანი მიაყენა უკრაინის არმიას რუსეთის ავიაციამ, განსაკუთრებით ვერტმფრენებმა. შესაბამისად, უკვე გადაწყვეტილია კიევისთვის ნანატრი ეფ-16-ების გადაცემა.

დასავლეთი უკრაინის უპირობო მხარდაჭერას განაგრძობს. ეს გამოიხატება როგორც ფინანსურ, ისე სამხედრო ნაკადებში. თუმცა რამდენ ხანს გასტანს ეს დახმარება, ამაზე სხვადასხვა დასავლურ გამოცემებში უკვე ისმის კითხვები. უფრო კონკრეტულად, კითხვები ისმის არა ზოგადად დახმარების მიცემა-არმიცემაზე, არამედ მის მასშტაბსა და ინტენსივობაზე. როგორც ამ საკითხზე საუბრისას თსუ-ს პროფესორი კორნელი კაკაჩია აცხადებს, უკრაინის მხარდაჭერის საქმეში გადამწყვეტი იქნება მომავალი წლის არჩევნები ევროპარლამენტსა და ამერიკაში. ამიტომ, კრიტიკულად მნიშვნელოვანია, კიევმა წლის ბოლომდე ბრძოლის ველზე რაც შეიძლება უფრო მასშტაბურ წარმატებას მიაღწიოს.

კრემლი კვლავ იმუქრება, რომ თუ მარცვლეულის შეთანხმება რუსეთის გარეშე გაგრძელდება, „მცდელობა რისკებს გამოიწვევს". როგორც საგარეო საქმეთა ყოფილი მინისტრი ირაკლი მენაღარიშვილი „რეზონანსთან" აცხადებს, არაა გამორიცხული, რომ რუსეთმა გემებზე თავდასხმა მოაწყოს და დააზიანოს, ამიტომაც „მოვლენების განვითარებას ყველა ძალიან შეშფოთებით უყურებს".

უკრაინელების კონტრშეტევა რომელიც გაზაფხულზე დაიწყო, ჯერჯერობით, ისეთი მასშტაბური და წარმატებული არ აღმოჩნდა, როგორსაც აანონსებდნენ. სამხედრო ანალიტიკოსები „რეზონანსთან" საინფორმაციო-ფსიქოლოგიურ ომზე საუბრობენ, სადაც დაპირისპირებაში პოზიციური ბრძოლები მიმდინარეობს და მხარეებს სურთ წარმოაჩინონ თავიანთი უპირატესობები საკუთარი ინტერესების სასარგებლოდ. ამ ეტაპზე წარმატებები არცერთ მხარეს არ აქვს, თუმცა, უკრაინას აქვს გარკვეული ინიციატივები.

უკრაინის უსაფრთხოების გარანტიებს, „დიდი შვიდეულის" გარდა, კიდევ 6 ქვეყანა შეუერთდა. როგორც კავკასიის საერთაშორისო უნივერსიტეტის პროფესორი და ანალიტიკოსი ვახტანგ მაისაია „რეზონანსთან" აცხადებს, ეს ქვეყნები უკრაინას ისედაც მაქსიმალურად ეხმარებოდნენ და უსაფრთხოების გარანტიებზე საუბარი უფრო საინფორმაციო-ფსიქოლოგიური ომის ნაწილია და გზავნილია რუსეთისთვის.