„ოპოზიციური ალიანსის" მიერ 26 მაისს ჩატარებულ აქციას მმართველი გუნდდში შეაფასეს „სიგიჟე, რომელსაც გამოხმაურებები არ აქვს". კრიტიკული იყო ოპოზიციის ნაწილის გამოხმაურებაც. თავად ალიანსის წარმომადგენელთა შეფასებით კი, ეს აქცია ბიძინა ივანიშვილისთვის ნამდვილი კოშმარი იყო.

პარლამენტის თავმჯდომარე, შალვაპაპუაშვილის შეფასებით, ეს იყო „ფინალური აკორდი იმის დასანახად, რომ საქართველო ნამდვილად იმსახურებს უკეთეს ოპოზიციას".

საქართველოში უცხოური ვალუტა კვლავ ჭარბი რაოდენობით შემოედინება. ამას ადასტურებს ოფიციალურტი მონაცემები. კერძოდ, აპრილში ეროვნულმა ბანკმა 333 მილიონი აშშ დოლარი შეიძინა. სფეროს სპეციალისტები ვარაუდობენ, რომ მსგავსი შესყიდვები მომავალშიც განხორციელდება, ხოლო რაც შეეხება ეროვნული ვალუტის კურსს, ,,თიბისი კაპიტალის" პროგნოზით, ის გამყარებას გააგრძელებს და წლის ბოლოსთვის დოლართან მიმართებით  დაახლოებით 2.65 იქნება. პროგნოზს სპეციალისტების ნაწილი დადებითად უყურებს.

ოპოზიციის ალიანსის აქცია ხალხმრავალი გამოდგა, თუმცა, ძნელი სათქმელია, შეესაბამებოდა თუ არა ხალხის რაოდენობა ორგანიზატორთა მოლოდინს. იყო მცირე დაპირისპირებაც პოლიციასთან ხმის გამაძლიერებელ აპარატურასთან დაკავშირებით. ალიანსის ლიდერები მიიჩნევენ, რომ ეს შეკრება პროტესტის ახალი ტალღის დასაწყისი გახდება.

სომხეთის საპარლამენტო არჩევნებამდე 12 დღით ადრე, ერევანს ხანმოკლე ვიზიტით აშშ-ის სახელმწიფო მდივანი მარკო რუბიო ეწვია. ერევნის აეროპორტშივე გაფორმდა თანამშრომლობის ორი დოკუმენტი და შდგა ერთობლივი პრესკონფერენცია. ანალიტიკოსთა უმრავლესობა ამ ვიზიტს 7 ივნისის არჩევნების წინ აშშ-ის მხრიდან პრემიერ ნიკოლ ფაშინიანისა და მისი პარტიის მხარდაჭერის დემონსტრირებად აფასებს.

საქართველოს მოსახლეობის ყოველთვიური ხარჯების 39% სურსათზე მოდის. სპეციალისტების შეფასებით, ეს ნიშნავს, რომ ქვეყნის ეკონომიკური დონე საშუალოზე დაბალია. რაც უფრო მაღალია ეკონომიკური განვითარების დონე, მით ნაკლებია სურსათის წილი მოსახლეობის ყოველთვიურ ხარჯებში. მაღალშემოსავლიანი ქვეყნების მოსახლეობის ყოველთვიურ ხარჯებში დიდი წილი დასვენებასა და ფუფუნების საგნებს უჭირავს.

საქართველო დამოუკიდებლობის დღის მილოცვას უცხოეთიდან სხვადასხვა ფორმით იღებს - ზოგი უშუალოდ ქართველ ხალხს ულოცავს, სხვები კი ხელისუფლების წარმომადგენლებს. აქედან ოპოზიციამ განსაკუთრებით გამოარჩია აშშ-ის სახელმწიფო მდივნის მარკო რუბიოს მილოცვა, რომლის ადრესატიც „ქართველი ხალხია". მათი აზრით, ეს მიანიშნებს, რომ აშშ-ის ადმინისტრაციასა და „ოცნებას" შორის ურთიერთობი არ უმჯობესდება, მიუხედავად იმისა, რომ ბოლო პერიოდში სახდეპის მაღალი დონის დელეგაციები ჩამოდიან. თუმცა, მოგვიანებით ცნობილი გახდა, რომ მიხეილ ყაველაშვილს აშშ-ის პრეზიდენტმა დონალდ ტრამპმა პირადად მიულოცა დამოუკიდებლობის დღე.

რუსეთი კიევში „გადაწყვეტილების მიმღებ ცენტრებზე" დარტყმას უკვე ოფიციალურად აანონსებს. 24 მაისს უკრაინის დედაქალაზე ერთი მსგავსი დარტყმა უკვე იყო, რომელიც მოსკოვმა ოფიციალურად წარმოადგინა, როგორც „შურისგების აქტი" სტარობილსკში კოლეჯის საერთო საცხოვრებელზე უკრაინული იერიშის საპასუხოდ, რასაც დიდი მსხვერპლი მოჰყვა. ახლა კი კრემლში აცხადებენ, რომ ასეთი დარტყმები სისტემატურ ხასიათს მიიღებს.

მიმდინარე სამშვიდობო მოლაპარაკების ფონზე, აშშ-მა ირანის სამხრეთში ახალი საჰაერო დარტყმები განახორციელა, თეირანში კი აცხადებენ, რომ ამერიკული დრონი ჩამოაგდეს. მიუხედავად სამხედრო ესკალაციისა, აშშ-ის სახელმწიფო მდივანი მარკო რუბიო აცხადებს, რომ მხარეებს შორის დროებითი ზავისა და ბირთვული პროგრამის თაობაზე შეთანხმების მიღწევა კვლავ შესაძლებელია.

სამხედრო ფიცი წვევამდელებმა თბილისში და საქართველოს კიდევ 12 ისტორიულ ადგილზე დადეს, ქვეყნის ლიდერებმა კი 26 მაისის მნიშვნელობასა და სახელმწიფოებრიობის დაცვაზე ისაუბრეს. ღონისძიების მთავარი გზავნილები ერთიანობას, მშვიდობასა და დამოუკიდებლობის გაფრთხილებას შეეხებოდა.

აქციებზე დაკავებულთა შესაძლო შეწყალების საკითხზე ხელისუფლების პოზიცია უცვლელია - მმართველი გუნდი კვლავ მონანიების აუცილებლობაზე საუბრობს. საპატრიარქოში ადასტურებენ, რომ ამ საკითხზე ხელისუფლებასთან დიალოგი მიდის. ანალიტიკოსები კი იმაზე მსჯელობენ, თუ რატომ არ დგამს „ოცნება" ამ ნაბიჯს და რატომ გააქტიურდა ეს საკითხი კიდევ ერთხელ მაინცდამაინც ახლა, როდესაც საქართველოში მაღალი რანგის ამერიკული დელეგაცია იმყოფება.

ჯარიმების მუდმივად გაზრდისკენ მიდრეკილება საშიში ხდება. პარკირებიდან დაწყებული, ყველა ტიპის საყოფაცხოვრებო ჯარიმა გამკაცრებულია და ამას წარმოუდგენლად კამპანიური ფორმა აქვს. შესაბამისად, მკვეთრად მოიმატა ბიუჯეტში ჯარიმებიდან შესული თანხის მოცულობამ. ერთი ჩვეულებრივი ადმინისტრაციული ჯარიმა დასაქმებული ადამიანის შემოსავლის 10%-ს უტოლდება, რაც სპეციალისტების შეფასებით, მოსახლეობის შემოსავლის არაადეკვატურია.

დოჰაში აშშ-სა და ირანს შორის სამთვიანი ომის დასრულების მიზნით დახურული მოლაპარაკება მიმდინარეობს, რომლის ფარგლებშიც 14-პუნქტიანი ჩარჩო შეთანხმება, ჰორმუზის სრუტის ბლოკადის მოხსნა და ირანის გაყინული აქტივების საკითხი განიხილება. პარალელურად კი, აშშ-ის პრეზიდენტი დონალდ ტრამპი თეირანთან პროგრესს ადასტურებს და არაბულ ქვეყნებს „აბრაამის შეთანხმებაში" ჩართვისკენ მოუწოდებს.