ენმ-ის პოლიტსაბჭოს თავმჯდომარე, პატიმრობაში მყოფი ლევან ხაბეიშვილი სასამართლო სხდომაზე ოპოზიციას მკვეთრად დაუპირისპირდა. მან პოლიტიკურ პარტიებს აქტიურობისკენ მოუწოდა და მიმართა, რომ საკუთარ ხალხს მოუსმინონ. ამასთან, უკმაყოფილება გამოთქვა იმაზე, რომ ყველაზე შეიძლება გირაოს გამოყენება, მის გარდა.

„ქართულ ოცნებაში" ამბობენ, რომ ევროსაბჭომ საქართველოს უცხოური ჩარევის წინააღმდეგ ბრძოლისთვის გამოცდილების გაზიარება სთხოვა და ფაქტიურად „ყინულიც დაიძრა". თუმცა, ოფიციალურ დოკუმენტში ვკითხულობთ, რომ შესაბამისი მიმართვა ევროპის საბჭოს ყველა წევრ ქვეყანას გაეგზავნა და ანალიტიკოსთა ნაწილის თქმით, ეს ჩვეულებრივი პროცედურული ამბავია.

სტუ-სა და თსუ-ს გაერთიანების საკითხი კვლავ წინააღმდეგობის ცენტრშია - დისკუსიაში ოპოზიციის ბასტიონი, ილიას სახელმწიფო უნივერსიტეტიც ერთვება და საკანონმდებლო ცვლილებებს აკადემიური ავტონომიის საფრთხედ აფასებს. მმართველ გუნდში კი განათლების ხარისხსა და რეფორმის ეფექტურობაზე საუბრობენ.

მოსკოვში გენერლის მკვლელობის მორიგი მცდელობა განხორციელდა. ამჯერად, სიკვდილს გენერალ ლეიტენანტი ვლადიმერ ალექსეევი ებრძვის, რომელსაც უცნობმა თავმდასხმელმა რამდენჯერმე ესროლა. ჯერჯერობით უცნობია ვინ დგას ამის უკან, თუმცა გამომძიებლები არ გამორიცხავენ თავდამსხმელს კავშირი ჰქონოდა უკრაინის სადაზვერვო სამსახურებთან.

რა ბერკეტი გააჩნია სახელმწიფოს იმისთვის, რომ საკუთარი მოქალაქეები მედიკამენტების გაძვირებისა და ხელოვნური დეფიციტისგან დაიცვას? იცოდით, რომ გარკვეულ მედიკამენტებზე დეფიციტი ხელოვნურად იქმნება, რადგან სხვა გაიყიდოს? ჯანდაცვის მინისტრის, მიხეილ სარჯველაძის განცხადებით, ამ პრობლემის მოსაგვარებლად, საჭიროა ესენციური (აუცილებლად საჭირო ნუსხა) მედიკამენტები განისაზღვროს, რომლებიც აუცილებლად უნდა იყოს აფთიაქებში. რაც შეეხება დარგის სპეციალისტებს, აქ აზრი ორად იყოფა: ნაწილი მიიჩნევს, რომ სახელმწიფომ მკაცრად უნდა გააკონტროლოს სააფთიაქო ბიზნესი, ხოლო მეორე ნაწილი ამ პრობლემის გადაჭრის ერთადერთ გზას ყოვლისმომცველ ფარმაცევტულ რეფორმაში ხედავს. 

პრემიერი ირაკლი კობახიძე ამტკიცებს, რომ ტექნიკურ უნივერსიტეტში ტექნიკური მიმართულება იქცა გერად და ეს უნდა შეიცვალოს, ამასთან გეგმავს, თსუ-ს აღუდგინოს ის „მდგომარეობა", რაც თავის დროზე მისმა დამაარსებელმა ივანე ჯავახიშვილმა შექმნა.

ანალიტიკოსი რამაზ საყვარელიძე ფიქრობს, რომ მართალია, ბზარი ურთიერთობებში ამერიკამ გააჩინა, გამოსწორებისკენ ნაბიჯები, პირველ რიგში, ისევ ჩვენ უნდა გადავდგათ, მასშტაბებში სხვაობის გათვალისწინებით. სტუ-სა და თსუ-ს გაერთიანების შეფასებისას კი განაცხადა, რომ მართალია ეს ნაჩქარევი გადაწყვეტილებაა, თუმცა პრობლემები რეალურად არსებობს და ალტერნატიული რეფორმის ჩარჩო, კარგი იქნებოდა, თავად სტუ-ს პროფესურასაც შემოეთავაზებინა.

„მოსკოვის მექანიზმით" გათვალისწინებული ეუთო-ს ექსპერტთა მისია დაკომპლექტების პროცესშია და ჯგუფის წევრები მუშაობას დანიშვნიდან უმოკლეს ვადაში დაიწყებენ. ჯერჯერობით უცნობია კონკრეტულად რა ფაქტები გახდა საქართველოსთან მიმართებით ამ მექანიზმის გაქტიურების მიზეზი, თუმცა მანამდე მისიის ქვეყნებმა მიუთითეს საქართველოში ადამიანის უფლებების სერიოზულ დარღვევებზე.

უკვე რამდენიმე დღეა სოც ქსელებში და მედიაში მეხუთე პრეზიდენტის შესაძლო დაკავებაზე საუბრობენ. ოპოზიციაში ფიქრობენ, რომ „არ ეყოფათ გამბედაობა" სალომე ზურაბიშვილი დაიჭირონ, ხელისუფლებაში კი მიაჩნიათ, რომ ადამიანს, რომელიც „თავს ლეგიტიმურ პეზიდენტს უწოდებს, ან პასუხი უნდა მოსთხოვო, ან განსახილველად ფსიქიატრებს გადასცე".

ამერიკის იუსტიციის დეპარტამენტის მიერ გამოქვეყნებულმა მილიონობით დოკუმენტმა ჯეფრი ეპშტეინის საქმეზე კითხვები უფრო გააღრმავა - მიუხედავად იმისა, რომ ახალი სისხლისსამართლებრივი დევნის საფუძველი ვერ მოიძებნა, კონგრესში გამოძიება გრძელდება, გავლენიანი ფიგურები ჩვენებისთვის ემზადებიან, ხოლო ნაწილობრივ გაუმჟღავნებელი ფაილების ირგვლივ პოლიტიკური და საზოგადოებრივი დაძაბულობა იზრდება.

აკადემიური წრეები უნივერსიტეტების გაერთიანების იდეას მკაფიო ეწინააღდეგებიან -თსუ-ს წარმომადგენლობითმა საბჭომ 40 ხმით ერთსულოვნად რეორგანიზაციის საკითხს მხარი არ დაუჭირა, მაშინ როცა პარლამენტმა უკვე დაამტკიცა საკანონმდებლო ცვლილებები. პროფესურის ნაწილი და სტუდენტები პროტესტს აგრძელებენ და პროცესს ქვეყნის უმაღლესი განათლების სისტემისთვის გადამწყვეტ ეტაპად აფასებენ. „ოცნებაში" კი აანონსებენ, რომ ეს ნაბიჯი განათლების სისტემას უფრო გაამყარებს.