28 თებერვალს მეტეოროლოგიური პირობები შედარებით გაუმჯობესდა და შსს-ის ინფორმაციით, დილიდან დასავლეთ საქართველოში სამაშველო ოპერაციებში სასაზღვრო პოლიციის ვერტმფრენი ჩაერთო, რომელიც მოსახლეობას პირველად ნივთებს და საკვებს მიაწვდის. ერთკვირიანმა დიდთოვლობამ ყველაზე მეტად დასავლეთ საქართველო დააზარალა, კვლავ რჩება პრობლემები ელექტროენერგიის, ბუნებრივი აირის, წყლის მიწოდების კუთხით, თუმცა უპრეცედენტო ჩართულობის შედეგად, გზების ძირითადი ნაწილი გაწმენდილია, ამასთან, ნაწილობრივად აღდგენილია ელექტროენერგიაც. სამხედროები და მოხალისე ჯგუფები სოფლის გზებს ასუფთავებენ და თოვლში ჩარჩენილ ხალხს ეხმარებიან.

რუსული ელექტრომატარებელი „ლასტოჩკა", რომელიც სოჭსა და გაგრას შორის გადაადგილდება, რეგურალურ სამგზავრო რეისებს უკვე სოხუმშიც შეასრულებს, სატესტო მგზავრობა მატარებელმა 27 თებერვალს განახორციელა. ამავე დღეს, სოხუმის აეროპორტში საცდელი რეისის შემდეგ, კიდევ ერთი თვითმფრინავი აფრინდა. ამაზე ჯერჯერობით თბილისს ოფიციალური განცხადება არ გაუკეთებია, თუმცა როგორც ოპოზიცია აცხადებს, ხელისუფლებამ დუმილის რეჟიმი უნდა დაარღვიოს, რადგან ინფრასტრუქტურის განვითარება საბოლოო ანექსიამდე მიიყვანს ქვეყანას.

არასამთავრობო ორგანიზაციები საჯარო გადაწყვეტილების მიღების პროცესში ჩართული აღარ იქნებიან. პარლამენტი საკანონმდებლო პაკეტის განხილვას იწყებს, რომლის ინიციატორებიც „ქართული ოცნებისა" და „ხალხის ძალის" წევრები არიან. მმართველ პარტიაში აცხადებენ, რომ ე.წ. ენჯეოები სახელმწიფოსთვის ძირგამომთხრელ საქმიანობას ეწეოდნენ. არასამთავრობო ორგანიზაციებში კი კანონპროექტს აკრიტიკებენ და ამბობენ, რომ „ოცნება" მიზანმიმართულად ცდილობს ხალხის დემორალიზებასა და მათ გაქრობას.

„ოცნება" დაახლოებით ხუთ თვეში აპირებს გამოაცხადოს ადგილობრივი თვითმმართველობის არჩევნების თარიღი - ამ განცხადებიდან რამდენიმე დღეა გასული, თუმცა, ოპოზიციას ჯერ ამაზე კონკრეტული პოზიცია არ გამოუხატავს, აპირებს თუ არა არჩევნებში მონაწილოებას, ან ვინ აპირებს ბარიერგადალახული თუ ზოგადად ოპოზიციური სპექტრიდან.

დასავლეთ საქართველოში სტიქიას ისევ ებრძვიან. სინოპტიკოსები ვარაუდობენ, რომ თოვა 28 თებერვლიდან შეწყდება. სკოლებში სწავლა შეჩერებულია, აჭარის სკოლებში კი 4 მარტიდან განახლდება. მმართველი პარტიის წარმომადგენლები ადგილზე იმყოფებიან და აცხადებენ, რომ ინტენსიური სამუშაოები გრძელდება. ოპოზიცია „ქართულ ოცნებას" გულგრილობაში ადანაშაულებს, რადგან „შესაბამისი ტექნიკა ნაყიდი არაა".

„მედიის შესახებ კანონპროექტის" გარშემო საუბარი არ წყდება. მმართველი პარტია აცხადებს, რომ კანონპროექტი მხოლოდ ობიექტურობის სტანდარტის დაწესებას ითვალისწინებს. ხელისუფლება აანონსებს, რომ მედია თვითრეგულირებიდან სახელმწიფო რეგულირებაში გადავა. ოპოზიციაში კი ამბობენ, რომ ხელისუფლება ცდილობს „ცენზურის ინსტრუმენტის" ხელში ჩაგდება და ქვეყანაში კრიტიკული აზრის ჩახშობას.

მეხუთე პრეზიდენტ სალომე ზურაბიშვილის 5-პუნქტიანი გეგმა ოპოზიციის დიდი ნაწილისთვის გარკვეულწილად მიუღებელი აღმოჩნდა. ენმ-ში ამბობენ, რომ ესაა "თავის მოტყუება", რადგან პირველი რიგის ამოცანა უნდა იყოს არა ახალი არჩევნების გეგმა, არამედ "სისტემის დემონტაჟი", გახარიას პარტიაშიც აცხადებენ, რომ არავისთან არც გაერთიანდებიან და არც ერთიან სიაში შევლენ.

"ფარა"-ს კანონს, რომელიც "ოცნების" თქმით, ამერიკული კანონმდებლობიდან სიტყვა-სიტყვით თარგმნეს, სისხლის სამართლის კოდექსში ცვლილებები ახლავს თან. კანონპროექტის მიხედვით, "უცხოური აგენტების რეგისტრაციის აქტის" დარღვევა, გათვალისწინებული ვალდებულებების შეუსრულებლობა, ან არაჯეროვნად შესრულება ისჯება ჯარიმით, ან თავისუფლების აღკვეთით 5 წლამდე ვადით, იურიდიული პირი კი ისჯება ჯარიმით.

„მოსახლეობამ პირველ რიგში დათოვლილი სახლები უნდა გაწმინდოს. მესმის, რომ ეს ძალიან რთულია და ბევრ რისკებთანაა დაკავშირებული, მაგრამ სხვანაირად სახლები დაინგრევა", - აცხადებს „რეზონანსთან" „მწვანეთა მოძრაობის" თავმჯდომარე ნინო ჩხობაძე, რომელიც დასავლეთ საქართველოს მოსახლეობას ურჩევს, რომ გზებზე სიარულს მაქსიმალურად მოერიდონ.

25 თებერვლის აქციის მთავარი მოთხოვნა ვადამდელი არჩევნების ჩატარება და პოლიტპატიმრების გათავისუფლება იყო, თუმცა როგორც "ქართულ ოცნებაში" აცხადებენ, ვადაზე ადრე არჩევნების ჩანიშვნის საკითხი არ განიხილება. ოპოზიცია კი გაზაფხულზე "გადამწყვეტ ბრძოლას" აანონსებს, პროტესტანტები კი ამბობენ, რომ აქციები უწყვეტი იქნება, სანამ მოთხოვნები არ დაკმაყოფილდება.

მიმდინარე და მომდევნო კვირა საკმაოდ დატვირთულია ისეთი შეხვედრებითა და კონსულტაციებით, რომელიც, სავარაუდოდ, გადამწყვეტი იქნება უახლოესი ათწლეულების მსოფლიო მოწყობის თვალსაზრისით. ევროპელი ლიდერები აშშ-ის პრეზიდენტს დონალდ ტრამპს ერთმანეთის მიყოლებით ხვდებიან, 6 მარტს კი ევროპული საბჭოს საგანგებო სამიტი იმართება. ანალიტიკოსების შეფასებით, ეს ყველაფერი ეპოქალურ ცვლილებებს მოასწავებს, რომელიც იმაში გამოიხატება, რომ სრულდება ერა, როდესაც ევროპის უსაფრთხოება აშშ-ს ჰქონდა „გადაბარებული" და ახლა ევროპა, უკრაინაში მიმდინარე სრულმასშტაბიანი ომისა და რეალური საფრთხეების ფონზე, ფაქტიურად დამოუკიდებლად ცდილობს თავისი უსაფრთხოების ახალი არქიტექტურის ჩამოყალიბებას.

სამი გარდაცვლილი, ათეულობით დაზარალებული და დანგრეული სახლი. ასეთია ბოლო მონაცამები დასავლეთ საქართველოდან, სადაც ხალხი დიდთოვლობას ებრძვის. განსაკუთრებით მძიმე მდგომარეობაა გურიასა და აჭარაში, სადაც მოსახლეობის ნაწილი დენისა და ბუნებრივი აირის გარეშეა დარჩენილი. მოსახლეობის დახმარების პროცესში თავდაცვის ძალები ჩაერთვნენ.