საქართველოს პრემიერ-მინისტრი ირაკლი ღარიბაშვილი ევროკომისიის პრეზიდენტს ურსულა ფონ დერ ლაიენს წერილით მიმართავს - იგი ევროპარლამენტის მიერ 9 ივნისს მიღებული რეზოლუციაზე ამახვილებს ყურადღებას და ხაზგასმით აღნიშნავს, რომ დოკუმენტი ბევრ „დაუსაბუთებელ ჩანაწერს და ფაქტობრივ უზუსტობას შეიცავს", რისთვისაც ევროკომისიას მოუწოდებს მკაფიო პოზიცია გამოხატოს ბრალდებებზე არაფორმალურ მმართველობასთან დაკავშირებით, ასევე მკაფიოდ გაემიჯნოს დეოლიგარქიზაციის შესახებ ჩანაწერის პერსონიფიკაციას.

„ქართული ოცნების" მიერ რიგგარეშე სესიაში მონაწილეობაზე უარის თქმის გამო, კვორუმი არ შედგება, შესაბამისად, პლენარული სხდომები აღარ გაიმართება. მმართველმა გუნდმა რიგგარეშე სხდომებში მონაწილეობაზე უარი იმით ახსნა, რომ ამ პროცესის მიზანი არა ევროკომისიის რეკომენდაციის შესრულება, არამედ ოპოზიციის მხრიდან პოლარიზაციის გაღრმავების მცდელობაა. თავად ოპოზიცია კი საპასუხოდ ამბობს, რომ „ოცნება" ამით საქართველოს ევროპულ მისწრაფებებს ბოიკოტს უცხადებს.

ბოლო დროს წამოვიდა კოვიდ 19-ის ახალი შტამი. ამიტომ მაქსიმალურად უნდა გამოვიჩინოთ სიფრთხილე. ღმერთმა ნუ ქნას, ჩამოყალიბდეს კიდევ ახალი, ბევრად ძლიერი შტამი, რომელიც უფრო გამძლე იქნება და ბევრად ცუდ გავლენას მოახდენს ადამიანებზე ჯანმრთელობის თვალსაზრისით. - ამის შესახებ ინფექციონისტი და ჯანდაცვის ექსპერტი ირაკლი ხმალაძე „რეზონანსთან" საუბრობს.

„ცდილობენ დაგვემუქრონ ყირიმზე თავდასხმით. ამასთან დაკავშირებით მინდა ვთქვა - მათ ესმით ასეთი განცხადებების შედეგები. შედეგები კი აშკარაა, რომ თუ მსგავსი რამ მოხდება, ყველა მათგანისთვის ერთდროულად დადგება განკითხვის დღე" - ამის შესახებ რუსეთის უშიშროების საბჭოს თავმჯდომარის მოადგილემ დიმიტრი მედვედევმა განაცხადა და აღნიშნა რომ უკრაინისგან მომდინარეობს საფრთხე ყირიმზე თავდასხმისა.

საქართველოს ხელისუფლებისა და პირადად პრემიერ ღარიბაშვილის უშუალო ჩართულობითა და ძალისხმევით თბილისმა უმასპინძლა სომხეთისა და აზერბაიჯანის საგარეო საქმეთა მინისტრების, არარატ მირზოიანისა და ჯეიჰუნ ბაირამოვის ორმხრივი შეხვედრას. კავკასიაში სამშვიდობო პროცესის დაწყება მნიშვნელოვანია მოვლენაა რეგიონში უსაფრთხოების განსამტკიცებლად და საქართველოს დედაქალაქი სწორედ ის ადგილია, სადაც ორ დაპირისპირებულ მხარეს შორის პირდაპირი დიალოგი დაიწყო.

უკრაინაში პირველი შორი მანძილის, ზალპური ცეცხლის, მრავალჯერადი სარაკეტო სისტემები M270 ჩავიდა. უკრაინის თავდაცვის მინისტრის ოლექსი რეზნიკოვის განცხადებით, ბრძოლის ველზე უკრაინის სასარგებლოდ სერიოზული ცვლილებებია მოსალოდნელი. სამხედრო ექსპერტი ვახტანგ მაისაია „რეზონანსთან" ამბობს, რომ აღნიშნული შეიარაღება ქმნის საკმაოდ სერიოზული ტიპის ძალას, რომელსაც შეუძლია რუსულ საარტილეტიო-სარაკეტო პოტენციალთან გათანაბრება.

როგორ შეასრულებს საქართველო ევროპის პირობებს და როგორ გამოიყენებს გადაწეულ ვადას? - უკვე ცნობილია, რომ ევროკომისიამ საქართველოსთან დაკავშირებით, კანდიდატის სტატუსის მინიჭების შესახებ ანგარიში არა წლის ბოლოს, არამედ 2023 წელს უნდა მოამზადოს. განცხადება ევროკომისიის წარმომადგენელმა, ევროპარლამენტის საგარეო ურთიერთობათა კომიტეტზე გააკეთა. მიხაილ რუპიმ აღნიშნა, რომ გადაწყვიტეს საქართველოს პოლიტიკური ელიტა დეპოლარიზაციის მცდელობებში არ ააჩქარონ.

უკრაინაში ომის 142-ე დღეა და რუსეთი კვლავ სამხედრო აგრესიას განაგრძობს.

23-მდე გაიზარდა ქალაქ ვინიცას ცენტრში რუსული სარაკეტო იერიშის შედეგად დაღუპულთა რიცხვი, მათ შორის 3 ბავშვია. დაშავებულია 117 ადამიანი. თავდასხმის შედეგად 50-ზე მეტი საცხოვრებელი კორპუსი დაზიანდა.

რუსულმა ჯარებმა დნეპროპეტროვსკის ოლქის ქალაქი ნიკოპოლი დაბომბეს. მსხვერპლის შესახებ ინფორმაცია ამ დროისთვის არ ვრცელდება.

სალომე ზურაბიშვილს რიგგარეშე სესიის მოწვევაზე გადაწყვეტილების მისაღებად ვადა დღის ბოლომდე აქვს. ოპოზიციაში კი ამ საკითხთან დაკავშირებით აზრთა სხვაობაა - ნაწილი, რომელიც სამუშაო ჯგუფებში არ მონაწილეობს, აცხადებს, რომ თუ რიგგარეშე სხდომა არ ჩაინიშნება, ისინი კანონპროექტზე მუშაობას გააგრძელებენ და სესიების განახლებისთანავე დააინიცირებენ.

სამხედრო მეცნიერებათა დოქტორი  და საქართველოს გენერალური შტაბის ყოფილი უფროსი ვახტანგ კაპანაძე „რეზონანსთან“ აცხადებს, რომ უკრაინის ფორნტზე ამჟამად ერთგვარი ოპერატიული პაუზაა და ორივე მხარე ძალების გადაჯგუფებას ახდენს. სევეროდონეცკისა და ლისიჩანსკის აღების შემდეგ რუსი აგრესორების წინაშე სერიოზული თავდაცვითი ზღუდეა, რომლის აღება მათ ძალიან გაუჭირდებათ. საით წარმართავენ ისინი შეტევას, ეს ამ ეტაპზე რთულად პროგნოზირებადია.

ევროკავშირის მხრიდან 12-პუნქტიანი გეგმის შესრულების ვადის გახანგრძლივებას შეფასებები მოჰყვა პოლიტიკურ სპექტრში. ოპოზიციაში ფიქრობენ, რომ ვადის გადაწევა „ქართული ოცნების" პასუხისმგებლობა და ერთგვარი პოლიტიკური მარცხია, მმართველ გუნდში კი ამბობენ, რომ გამართლდა ის, რასაც ამბობდნენ და რეალურად არავითარი ლოგიკა არ იდგა ცაიტნოტის უკან.

უკრაინის ომის 141-ე დღე - რუსმა აგრესორებმა რამდენიმე ქალაქი სასტიკად დაბომბეს, დაღუპულია ათობით მშვიდობიანი მოსახლე, მათ შორის ბავშვები. ყველაზე სასტიკი იყო თავდასხმა ქალაქ ვინიცაზე, რომელიც დასავლეთ უკრაინაში მდებარეობს და საბრძოლო მოქმედებების არეალიდან ძალიან დაშორებულია. აქ, ბოლო მონაცემებით, ფრთოსანი რაკეტებით დაბომბვას 20 ადამიანი ემსხვერპლა, მათგან 3 ბავშვი. ამას გარდა, ბახმუტში რუსებმა „ურაგანის“ ტიპის რაკეტები გამოიყენეს, არის მსხვერპლი.  რუსეთი უკრაინის ტერიტორიებზე ინტენსიურ იერიშებს განაგრძობს. ბახმუტში, დაბომბვის შედეგად, ერთი ადამიანი დაიღუპა და 5 დაშავდა. დაზიანდა დაახლოებით 8 საცხოვრებელი სახლი. ოკუპანტებმა საჰაერო იერიში მიიტანეს ზაპოროჟიაზეც. ორი რაკეტა კომერციულ ობიექტს დაეცა, შედეგად 15 მშვიდობიანი მოქალაქე დაშავდა.