ქუთაისის შემდეგ უკვე თბილისში გაჩნდა გაზის მიწოდების პრობლემები და ეს ხდება მაშინ, როდესაც საქართველოში ბოლო დღეებში ამინდის მკვეთრი გაუარესებაა და სინოპტიკოსები მომდევნო დღეებში ყინვას ვარაუდობენ. მოსახლეობას უწევს 2-3 დღე გაზის გარეშე ყოფნა, რაც საყოფაცოხვრებო პრობლემებს იწვევს. ბუნებრივი აირის შეწყვეტის მთავარი მიზეზი არის გეგმიური სამუშაოები, რომელსაც კომპანია "თბილისი ენერჯი" წესით ზამთრის დაწყებამდე უნდა ასრულებდეს, რომ  მოსახლეობას მსგავსი პრობლემები არ შეექმნას.

ბიტკოინის ღირებულება დიდი და ხანგრძლივი ვარდნის შემდეგ კვლავ აღმა წავიდა. შარშან წლის ბოლოს თუ ფასი 5000 დოლარს არ აღემატებოდა, ახლა უკვე 10 000 დოლარს გადასცდა. შესაბამისად, მის მიმართ ინტერესიც ისევ გაიზარდა და საქართველოში დახურული „მინიფერმები“ კვლავ ამოქმედდა. ამიტომაც იზრდება ელექტროენერგიის ხარჯიც. მას შემდეგ, რაც მესტიაში უკანონო მაინინგის შესაძლებლობა შეიზღუდა, სპეციალისტები ამბობენ, რომ კრიპტოვალუტის მომპოვებლები იმ რეგიონებში გადაინაცვლებენ, სადაც ელექტროენრგიის დანახარჯის მხოლოდ 50%-ს იხიდიან.

მართვის უფლების მისაღები გამოცდის სისტემაში ცვლილებებია. შესაბამისი კანონპროექტი საქართველოს პარლამენტში უკვე განსახილველად შევიდა. ცვლილებები სერიოზულ გაძვირებას გამოიწვევს, არა მხოლოდ მართვის მოწმობის გამოცდის ჩაბარების, არამედ ავტოსკოლებში სწავლების კუთხითაც. მიუხედავად ამისა, სპეციალისტები მიიჩნევენ, რომ ეს არის ყველაზე გამართლებული ფასის მატება, რაც ბოლო პერიოდში განხორციელებულა საქართველოში.

ავტოსაგზაო შემთხვევების თავიდან აცილების მიზნით, საქართველოს გზებზე ე.წ. შავი წერტილები განისაზღვრება. პირველ ეტაპზე მოხდება არაუმეტეს 300-მეტრიანი მონაკვეთის დადგენა, სადაც 3 წლის განმავლობაში დაფიქსირდება არანაკლებ 4 საგზაო შემთხვევა, რომელსაც მოჰყვა ადამიანის გარდაცვალება ანდა ჯანმრთელობის მძიმე დაზიანება.

ანაკლიის პორტის პროექტის გაურკვეველი ვადით შეჩერების შემდეგ, ,,ეიპიემ ტერმინალს ფოთმა” კიდევ ერთხელ შეიტანა განაცხადი ნავსადგურის გაფართოებასთან დაკავშირებით. როგორც კომპანიაში ამბობენ, მათი მტკიცე განზრახვაა, ააშენონ ღრმაწყლოვანი პორტი ფოთში. ახლა ჯერი ეკონომიკის სამინისტროზეა, მისცემს თუ არა ,,ეიპიემს” ანაკლიის ალტერნატიული პროექტის განვითარების საშუალებას.

გახშირებული ავტოავარიების, უცხოეთიდან ძალიან ძველი მანქანების მუდმივი შემოდინებისა და ავტოპარკის დაძველების გამო, ქვეყანაში მომრავლდა სატრანსპორტო საშუალებები, რომლებიც ვეღარ დადის და ქალაქის ქუჩებში წლობით უქმად არის გაჩერებული. ამიტომ მუშავდება საკანონმდებლო ცვლილება, რომლის მიხედვითაც მუნიციპალიტეტი მსგავსი ავტომობილების სპეციალურ სადგომზე გადაყვანის უფლებას მოიპოვებს, თუმცა უცნობია მანქანები უტილიზაციას დაექვემდებარება თუ უბრალოდ ჯართად დარჩება და აგრეთვე როგორ მოხდება ექსპროპრიაცია.

საბანკო სფეროში დაწერებული რეგულაციების გამო, დღეს სექტორი ახალი გამოწვევების წინაშეა. განსაკუთრებული პრობლემა იპოთეკურ და სხვა ტიპის სამომხმარებლო სესხებზე ხელმისაწვდომობის შეზღუდვამ გამოიწვია. მიუხედავად არაერთი დაპირებისა, მარეგულირებელის მხრიდან, რომ რეგულაციები გადაიხედებოდა და შემსუბუქდებოდა, ეს ამ დრომდე არ მომხდარა.

კორონავირუსი ეგვიპტისა და საქართველოს ტურიზმის კუთხით დამატებით სარგებელს მოუტანს, ამის შესახებ რუსული მედიასაშუალებები უკვე აქტიურად წერენ. გავრცელებული საშიში ვირუსის გამო, მოგზაურები აზიაში ვიზიტისგან თავს შეიკავებენ, ხოლო მათი ალტერნატივა კი საქართველო და ეგვიპტე იქნება.

ოფიციალური სტატისტიკა ქვეყნის ეკონომიკურ მდგომარეობას ვერ ასახავს. ხელისუფლება თითქმის ყველა მეთოდის გამოყენებით ცდილობს, რომ რეალობა გააყალბოს. საფუძვლიან ეჭვს იწვევს ის გარემოება, რომ ბოლო წლების განმავლობაში ეკონომიკაში მუდმივად პრობლემაა, არ იქმნება სამუშაო ადგილები, ვერ ვითარდება წარმოება, მაგრამ ამ პროცესის პარალელურად სტატისტიკური მაჩვენებლები თითქმის ყველა შემთხვევაში ,,სტაბილურია".

გაზის სისტემების გაუმართაობის გამო აფეთქების, დაღუპული და დაშავებული ადამიანების შესახებ ინფორმაცია ზამთრის სეზონზე ძალიან ხშირად ვრცელდება, თუმცა დაპირების გარდა, ავარიულ მდგომარეობაში მყოფი კომუნიკაციების მოწესრიგებაზე, რეალურად არავინ ზრუნავს. თბილისში უკვე თითქმის ერთი წელია, ,,თბილისი ენერჯი” ოპერირებს, თუმცა ამ მხრივ ისევ არაფერი შეცვლილა და დედაქალაქის მოსახლეობა კვლავ "ბომბზე ზის".

ადგილობრივ წარმოების პრობლემა საქართველოში რეალურად ვერ გვარდება. დარგის განვითარებას სახელმწიფო პროგრამებიც ვერ შველის. ელემენტარულად, საბანკო სერვისებზე ხელმისაწვდომობაც გართულებულია და ამდენი ხნის განმავლობაში მთავრობამ მეწარმეებს ეს პრობლემა ვერ მოუგვარა. მიუხედავად იმისა, რომ 2019 წლის განმავლობაში ექსპორტი თვალსაჩინოდ გაიზარდა, სინამდვილეში სიტუაცია არც ამ მიმართულებით არის გამოსწორებული, ზრდა რეექსპორტის ხარჯზეა და წმინდა ექსპორტის მაჩვენებელი ისევ დაბალ დონეზე რჩება.

ჩინური კორონავირუსის გავლენა უკვე ქართულმა ეკონომიკამაც იგრძნო. იქიდან გამომდინარე, რომ ქართული ბაზრის დიდი წილი ჩინურ პროდუქტს უკავია, პრობლემებმა ნელ-ნელა თავი იჩინა. განსაკუთრებით დიდი თავსატეხი გაუჩნდათ იმ ადამიანებს, ვისაც უშუალოდ აქვს ბიზნესთან შეხება და ჩინეთიდან ჩამოაქვთ სხვადასხვა სახის პროდუქცია. მათთვის უზარმაზარი ბაზრის კარი თანდათან იხურება.ეკონომისტები დაუფარავად აცხადებენ, რომ ჩინეთის ეკონომიკა დიდი დარტყის ქვეშაა, რადგან წარმოებისა და მომსახურების ობიექტების საკმაოდ დიდი ნაწილი დახურულია.