სვანეთს ჭარბი ელექტრომოხმარების გამო შესაძლოა, შეზღუდვები დაუწესდეს. კონკრეტულად რა ნაბიჯი გადაიდგმება, უცნობია, თუმცა მცდელობაა, რომ ბიზნესს დენის გადასახადის ნაწილობრივი გადახდა დააკისრონ. წინააღმდეგ შემთხვევაში, მოხმარება კატასტროფულად იზრდება და ტენდენცია გაგრძელდება, რაც მთლიანად ენერგოსექტორს სერიოზულ საფრთხეს უქმნის. იმის გამო, რომ კრიპტოვალუტის გამომუშავება დიდ რესურსს მოითხოვს, ხოლო რეგიონი გადასახადისგან თავისუფალია, ენერგოსისტემა შეიძლება გამოუვალ სიტუაციაში აღმოჩნდეს.  პრობლემას ხელისუფლებაც აღიარებს. როგორც მესტიის მერმა კახა ჟორჟოლიანმა განაცხადა, მუნიციპალიტეტში ელექტროენერგიის გადასახადის საკითხი კვლავ ერთ-ერთ მთავარ გამოწვევად რჩება. განსაკუთრებით პრობლემურია ე.წ. ბიტკოინის აპარატების მიერ გაზრდილი ენერგომოხმარება და აუცილებელია, რომ ბიზნესებმა და მათ, ვისაც მაინერის დადგმა სურს, დენის საფასურის გადახდა დაიწყონ. 

გაზის მიწოდების კონტრაქტი აზერბაიჯანთან 20 წლის ვადით განახლდა. ახალ ხელშეკრულებასთან დაკავშირებით ხელისუფლება დამატებით დეტალებს არ ასაჯაროვებს. მწირი ინფორმაციის ფონზე ენერგეტიკოსებს გაფორმებული კონტრაქტის შეფასება უჭირთ, თუმცა აცხადებენ, რომ რადგან საუბარია არაკომერციულ გაზზე შესაძლოა, არსებულთან პირობებთან მიახლოებული იყოს, რაც მთლიანობაში წინგადადგმული ნაბიჯია და სამომავლოდ კომუნალური ტარიფის შენარჩუნებასაც შეუწყოს ხელი.

საქართველოს ეროვნულმა ბანკმა ისევ ოქროს რეზერვის შევსება გადაწყვიტა. სებ-ის პრეზიდენტის განცხადებით, 2024 წლის გაზაფხულზე ოქროს შესყიდვის ოპერაცია განსაკუთრებით მომგებიანი აღმოჩნდა, ამიტომ ქვეყნის მთავარი ბანკი ოქროს რეზერვის შევსებას წელსაც გეგმავს. ეკონომისტები ამ პროცესს დადებითად აფასებენ და აცხადებენ, რომ ეს არის სავალუტო დივერსიფიკაცია, რასაც სხვადასხვა ქვეყნის ცენტრალური ბანკები აქტიურად იყენებენ. 

ბოლო 1 თვეა ლარის კურსი გამყარებას ტრენდს ინარჩუნებს. ეროვნული ბანკის მხრიდან ამ მიმართულებით არსებულ პოლიტიკას, სპეციალისტები დადებითად აფასებენ, თუმცა ფიქრობენ, რომ ლარის  შეუმჩნევლად გამყარების პოლიტიკა მსოფლიო ბაზარზე მაღლა დაძრული ფასების სრულად დაბალანსებას მაინც ვერ შეძლებს, რადგან საქართველო იმპორტდამოკიდებული ქვეყანაა და თუ შავმა ოქრომ გაძვირება გააგრძელა, მას აუცილებლად ჯაჭვური რეაქცია ექნება.

ხორბლის მოსავლის აღების დრო მოახლოვდა. სულ რამდენიმე კვირაში ალოობა იწყება, მაგრამ ფერმერები, ფაქტობრივად, მოუმზადებლები არიან. ამის მიზეზი გაზრდილი ხარჯია, რასთან გამკლავება დამოუკიდებლად უჭირთ. სავარაუდოდ, მოსავლიანობა, წინა წლის ანალოგიურ პერიოდთან შედარებით, შენარჩუნდება, თუმცა ხარისხი წელსაც პრობლემა იქნება. კლიმატური პირობების გამო, სტრატეგიული პროდუქტის ხარისხიც და ფასიც, შეიძლება, კითხვნის ნიშნის ქვეშ დადგეს. 

პარტია „ხალხისთვის“ თავმჯდომარე ანა დოლიძე, ხალხზე ზრუნვის ახალი ინიციატივით გამოდის. იმის გამო, რომ მოსახლეობის აბსოლუტურ უმრავლესობას არც ისე დალხენილი სოციალურ-ეკონომიკური მდგომარეობა აქვს, „ხალხოსანი“ პოლიტიკოსი ხალხის გულების მოსაგებად ითხოვს, რომ საზოგადოებრივი ტრანსპორტი უფასო იყოს, ოღონდ მხოლოდ საქართველოს მოქალაქეებისთვის. სინამდვილეში, ევროპის რამდენიმე ქალაქში საზოგადოებრივი ტრანსპორტი მართლაც უფასოა, ოღონდ იქაური მოსახლეობა ისედაც, ძირითადად, მუნიციპალური ტრანსპორტით სარგებლობს და ველოსიპედებით გადაადგილდება. ტრანსპორტის დარგის პროფესიონალების შეფასებით, ანა დოლიძის იდეა უტოპიაა. საქართველოს მოსახლეობა საკუთარ ავტომობილებს ასე იოლად არ შეელევა და არც საზოგადოებრივ ტრანსპორტში გადაჯდება.  

პრემიერ-მინისტრის დავალება ნაწილობრივ შესრულებულია. ფასების შემსწავლელმა დროებითმა საპარლამენტო კომისიამ მუშაობა დაასრულა და პირველი შედეგი უკვე სახეზეა. მთავრობასა და ბიზნესს შორის კომუნიკაციის შედეგად, გამოიკვეთა პირველადი მოხმარების 15 დასახელების პროდუქტი, რომლებსაც 20-25%-იანი ფასდაკლება შეეხება და ქსელურ მარკეტებში, სპეციალურ ადგილებზე განთავსდება. ეკონომისტების შეფასებით, ეს გადაწყვეტილება ამ პრობლემის მოგვარების მოკლევადიანი შედეგია, თუმცა გრძელვადიან პერსპექტივაში, სრულიად შესაძლებელია, რომ პროდუქციის ჩამონათვალიც გაიზარდოს და ფასდაკლების პროცენტიც.   

ექსპორტი ისტორიულ მაქსიმუმზეა, ცოტათი შემცირდა იმპორტის მოცულობა, რაც ბოლო წლების განმავლობაში პირველად დაფიქსირდა. ცვლილება, ძირითადად,  გეოპოლიტიკურ ვითარებას უკავშირდება, განსაკუთრებით ახლო აღმოსავლეთში მიმდინარე დაძაბულობას, რის გამოც შუა დერეფანში საქართველოს როლი საგრძნობლად გაიზარდა. 

საქართველოს რკინიგზის გავლით, თურქმენეთიდან ტვირთბრუნვა კიდევ უფრო მეტად გაიზრდება. ორ ქვეყანას შორის ტვირთბრუნვის ისედაც პოზიტიური დინამიკა არსებობს, თუმცა ქართველი ეკონომისტებისა და სპეციალისტების შეფასებით, თურქმენეთის ამგვარ გააქტიურებას ცენტრალური აზიის სხვა ქვეყნებიც შეუერთდებიან. ამ პროგნოზს ის ფაქტიც ამყარებს, რომ ერთი მხრივ, რუსეთ-უკრაინის ომის გამო, ჩრდილოეთის დერეფანი დასანქცირებულია, ხოლო მეორე მხრივ, ირანსა და ახლო აღმოსავლეთის კონფლიქტის გამო - ჰორმუზის სრუტე ჩაკეტილია. 

საქართველოს ეკონომიკა იზრდება, მაგრამ უმუშევრობა ვეღარ მცირდება. 2025 წელს საქართველოში უმუშევრობის დონე, 2024 წელთან შედარებით, უცვლელი დარჩა და 13.9 პროცენტი შეადგინა. ამგვარი სტატისტიკის საფუძველს სპეციალისტების შრომის ბაზრის სპეციფიკაში ხედავენ და ხაზს უსვამენ განსაკუთრებით იმ გარემოებას, რომ სამუშაო ადგილებს, ძირითადად, მომსახურების სფეროში, სხვა ქვეყნებიდან შემოსული მოქალაქეები იკავებენ და სწორედ მათზე მოდის საქართველოს ეკონომიკის მზარდი წილი.

სახელმწიფო სოციალურად დაუცველ ოჯახების გამოხშირვაზე და დახმარების მიზანმიმართულ გადამისამართებაზე ალაპარაკლდა. აღნიშნულიდან გამომდინარე, მონაცემთა ბაზაში რეგისტრაციის წესი იცვლება. მთავრობის ახალი დადგენილებით, სისტემაში ჩნდება მკაცრი ფინანსური ზღვარი, რომელიც მაღალი შემოსავლის მქონე პირებს დახმარების მიღების შესაძლებლობას ავტომატურად შეუწყვეტს. სპეციალისტები ახალ რეგულაციებს სკეპტიკურად უყურებენ. მათთვის ძნელი აღსაქმელია, რომ მსგავსი მიდგომებით სფეროში არსებითად რამე შეიცვლება, თუმცა ხაზგასმით აღნიშნავენ, რომ ახალი რეგულაციები საბიუჯეტო ხარჯის შესამცირებლად გადადგმული ნაბიჯია და შესაძლოა, ადამიანებმა რეალურ დასაქმებაზეც იფიქრონ.

მთავრობის დაპირების მიუხედავად, ფასებთან გამკლავება რეალურად ჭირს. სავაჭრო ქსელების დაანონსებული "საოჯახო კალათა" ამ მხრივ შედეგს ვერ გამოიღებს, სანამ ფასების კლების პროცესი საკანონმდებლო დონეზე არ დარეგულირდება. სპეციალისტების ვარაუდით, ,,საოჯახო კალათაში" ისეთი პროდუქტები შევა, რომელზეც ისედაც ცხადდება ფასდაკლება და ამ ინიციატივით პრობლემა ვერ გადაწყდება. თანაც საუბარია დაახლოებით 12 დასახელების პროდუქტზე, დანარჩენზე საუბარი არც კი მიმდინარეობს.