ხელისუფლება მოხმარებიდან ამოღებული ავტომობილების ნარჩენების მართვის სისტემის შექმნას გეგმავს. ამ მიზნით, გარემოს დაცვისა და სოფლის მეურნეობის მინისტრის მოადგილე ავტოიმპორტიორებს შეხვდა. სპეციალისტები ამ ინიციატივას მიესალმებიან და ამბობენ, რომ თუ ინიციატივა სწორად აღსრულდება, ერთდროულად რამდენიმე პრობლემა გადაიჭრება - ქალაქი გამოუსადეგარი ავტომობილებისგან გათავისუფლდება, საპარკინგე სივრცეებიც გამოთავისუფლდება და გარემოს დაცვის პრობლემებიც მოგვარდება. 

ყინული გალღვა - ევროპის რეკონსტრუქციისა და განვითარების ბანკი გეგმავს, საქართველოს კერძო სექტორს 300 მილიონი ევროთი დაეხმაროს. „იბიარდის“ კავკასიის რეგიონული ხელმძღვანელი, ალკის ვრიენიოს დრაკინისი აცხადებს, რომ მზად არიან, საქართველოს სხვადასხვა სექტორში, ბანკებში, ასევე მცირე და საშუალო საწარმოებში 300 მილიონ ევროზე მეტი ინვესტიცია განახორციელონ. ეკონომიკის ექსპერტები აცხადებენ, რომ ეს არის საქართველოს ისედაც ლეგიტიმური მთავრობის ლეგიტიმაციის პირდაპირი დადასტურება ევროპის უმსხვილესი ფინანსური ინსტიტუტისგან. ევროპის განვითარებისა და რეკონსტრუქციის ბანკი მხოლოდ საერთაშორისო მასშტაბის ფინანსური ორგანიზაცია არ არის, დიდწილად, ის ევროპის პოლიტიკასაც განსაზღვრავს. 

მიმდინარე წლის მესამე კვარტალში, საქართველოში უმუშევრობის დონე შემცირდა და 13.3% გახდა. სტატისტიკის ეროვნული სამსახურის მონაცემებიდან დასტურდება, რომ შარშანდელ ანალოგიურ პერიოდთან შედარებით, უმუშევრობა 0.5%-ით შემცირდა. ეკონომისტები ამ ფაქტს დადებითად აფასებენ და ამბობენ, რომ ბოლო წლების სტატისტიკის მიხედვით, უმუშევრობა ყოველწლიურად მცირედით, მაგრამ მაინც იკლეს. ეს კი გრძელვადიან პერსპექტივაში, საკმაოდ დიდ გაუმჯობესებას მოიტანს. 

რუსეთში საემიგრაციო პოლიტიკის გამკაცრებამ ქართველ გადამზიდავებს სერიოზული პრობლემა შეუქმნა. ქვეყნის ტერიტორიაზე წლის განმავლობაში ყოფნის ვადა 180-დან 90 დღემდე შემცირდა. ნებისმიერ მძღოლს, ვინც მეტი ხნით დაყოვნდება რუსეთში, მითითებულ ვადას გადააცილებს, აჯარიმებენ და ხუთწლიან დეპორტს უფორმებენ. ოფიციალური მონაცემით, 100-მდე მძღოლი უკვეგამოძევებულია. ასეთ სიტუაციაში მათ არ აქვთ სხვაგამოსავალი გარდა იმისა, რომ შეაჩერონ საქმიანობა ან ალტერნატიულ ბაზრებზე გადაერთონ.

2026 წლის 1-ლი იანვრიდან, ბიზნეს-ომბუდსმენის აპარატი გაუქმდება, ხოლო 2 მარტიდან - ანტიკორუფციული ბიურო და პერსონალურ მონაცემთა დაცვის სამსახური. ხელისუფლება ამ გადაწყვეტილებას ხარჯების ოპტიმიზაციით ხსნის, რასაც ექსპერტების ნაწილი ეთანხმება. შემდგომ ნაბიჯად, დარგის სპეციალისტები სახელმწიფო შპს-ების, სსიპ-ებისა და ააიპ-ების რეორგანიზაციასაც ელიან. მეორე ნაწილი კი მიიჩნევს, რომ ამ სამსახურების ლიკვიდაცია ერთგვარი კომბინაციაა თანამშრომელთა უმტკივნეულოდ გასათავისუფლებლად. 

ზამთრის გადატანა წელსაც გაჭირდება. ამის მიზეზი ადილობრივი  მოსავლის სიმცირეა. დეფიციტი არ იქნება და მარაგი იმპორტით შეივსება, თუმცა საქართველოში მოყვანილი პროდუქტები დახლებზე მინიმუმამდე შემცირდება, რაც გარკვეულწილად გავლენას ფასებზეც იქონიებს. სავარაუდოდ გაძვირდება იმპორტული ხილ-ბოსტნეულიც, ვინაიდან თურქეთშიც მოსავლიანობის დიდი კლებაა უამინდობის გამო. იმპორტი სხვა აზიური ქვეყნებიდან ჩანაცვლდება, მაგრამ უკვე სხვა ფასად. სპეციალისტების აზრით, ქვეყანას ერთ-ერთი მძიმე ზამთრის გადატანა მოუწევს. 

თხილის ფასმა მსოფლიოს ბაზრებზე და უკვე საქართველოშიც, რეკორდი მოხსნა. გაძვირების მთავარი ფაქტორი დაბალი მოსავლიანობაა, განსაკუთრებით თურქეთში, რამაც ქართული პროდუქტის ფასზეც ადეკვატურად იმოქმედა.  ამ ეტაპზე თხილი  ევროპულ ბაზრებზე 11,5 ევრო ღირს, სეზონის დასაწყისში კი 14 ევროს აღწევდა. შარშან ეს მაჩვენებელი 7-8,5 ევროს ფარგლებში იყო. მოსალოდნელია, რომ სეზონის განმავლობაში ფასი კიდევ შეიცვლება.

ქართული კურორტები დატვირთვას ვერ უძლებენ. ამის მიზეზი არახელსაყრეელი ინფრასტრუქტურაა, რომელიც თანამედოვე ინდუსტრიის მოთხოვნას ვერ პასუხობს. განსაკუთრებით ამ მხრივ ბაკურიანს უჭირს, თუმცა ანალოგიური მდგომარეობაა ბორჯომში, მესტიაში, გუდაურში, ბახმაროში და ა.შ. სადაც იმაზე მეტი დამსვენებელია, ვიდრე კურორტს ამის რესურსი გააჩნია. სპეციალისტები აქცენტებს სეზონურობაზე აკეთებენ და აცხადებენ, რომ გასააქტიურებელია მუშაობა, რათა კურორტებმა  წლის ნებისმიერ პერიოდში შეძლონ დამსვენებლების მიღება და დატვირთვა წელიწადის ყველა დროზე გადანაწილდეს, რაც მდგომარეობას შეამსუბუქებს.

სოფლის მეურნეობის სექტორში ჩართული კომპანიები და ფერმერები უცხოელი კონსულტანტების მომსახურებით ისარგებლებენ. ამის შესაძლებლობას იძლევა სოფლის განვითარების სააგენტოს ტექნიკური დახმარების პროგრამის ახალი მიმართულება - უცხოური ექსპერტების მომსახურების თანადაფინანსება. კონსულტაციების  მოიცავს, როგორც პირველადი პროდუქციის წარმოებასთან, ასევე მოსავლის დაბინავებასთან დაკავშირებულ ტექნოლოგიის მიმართულებას. 

ანაკლიის პროექტს ჯერ კიდევ არ ჰყავს ინვესტორი. ერთ-ერთ გადაცემაში, საქართველოს ყოფილი ელჩი ჩინეთში, დავით აფციაური ვარაუდობს, რომ ჩინურ სახელმწიფო კორპორაცია CCCC-თან კონტრაქტის გაფორმების გაჭიანურების მიზეზი გლობალური გეოპოლიტიკური ცვლილებები და რეგიონში არსებული რისკებია. პარტნიორები, სავარაუდოდ, დამატებით ანალიზს ატარებენ. ყოფილი ელჩის ამ ვარაუდს კატეგორიულად არ ეთანხმებიან ეკონომიკის ექსპერტები. მათი ინფორმაციით, ჩინურ სახელმწიფო კორპორაციასა და საქართველოს სახელმწიფოს შორის ჯერ კიდევ მიმდინარეობს მოლაპარაკებები, ასევე ზუსტდება ის ქვეპუნქტებიც, რაც ამ ხელშეკრულებას ახლავს. გაჭიანურების სავარაუდო მიზეზი შეიძლება იყოს საკადრო ცვლილებები საქართველოს მთავრობაში და ყველაზე მთავარი - აშშ-ჩინეთის ინტერესთა თანხვედრა სამხრეთის დერეფანში. 

ელექტროენერგიის გადასახადის გაძვირება, ფაქტობრივად, გადაწყვეტილია. როგორც გუშინ გახდა ცნობილი, დენის ტარიფი შესაძლოა, ისევ 3 თეთრით გაძვირდეს, რა მოცულობითაც 2 წლის წინ შემცირდა. ეს უკვე მეორე ასეთი კომბინაციაა. როდესაც ,,ქართული ოცნება" ქვეყნის სათავეში მოვიდა, 3.5 თეთრით შემცირდა დენის გადასახადი და მერე ზუსტად იმდენივეთი გაიზარდა. ამჯერადაც იგივე კომბინაცია გათამაშდება.

ქვეყანაში მინიმალური ხელფასი ჯერ ისევ 20 ლარია, რომელიც შევარდნაძოს დროს დაწესდა. ეს თავისებური კაზუსია. „გახარია საქართველოსთვის“ დეპუტატმა, სოფო ხორგუანმა ხელფასის მინიმალური ზღვრის კანონით დადგენა მოითხოვა. მისი ინიციატივით, მინიმალური ხელფასი 1000 ლარის ოდენობით უნდა განისაზღვროს, თუმცა ფინანსთა მინისტრმა განაცხადა, რომ ეს შეუძლებელია. ლაშა ხუციშვილმა განმარტა, რომ ეს ინიციატივა უმუშევრობას გამოიწვევს, რადგან ბიზნეს-ოპერატორები, რომლებიც ვერ შეძლებენ დადგენილ ზღვარზე ან ამ ზღვარს ზევით გადაუხადონ ხელფასი დასაქმებულებს, ცხადია, ამას მათი გათავისუფლება მოჰყვება.