ყინული გალღვა - ევროპის რეკონსტრუქციისა და განვითარების ბანკი გეგმავს, საქართველოს კერძო სექტორს 300 მილიონი ევროთი დაეხმაროს. „იბიარდის“ კავკასიის რეგიონული ხელმძღვანელი, ალკის ვრიენიოს დრაკინისი აცხადებს, რომ მზად არიან, საქართველოს სხვადასხვა სექტორში, ბანკებში, ასევე მცირე და საშუალო საწარმოებში 300 მილიონ ევროზე მეტი ინვესტიცია განახორციელონ. ეკონომიკის ექსპერტები აცხადებენ, რომ ეს არის საქართველოს ისედაც ლეგიტიმური მთავრობის ლეგიტიმაციის პირდაპირი დადასტურება ევროპის უმსხვილესი ფინანსური ინსტიტუტისგან. ევროპის განვითარებისა და რეკონსტრუქციის ბანკი მხოლოდ საერთაშორისო მასშტაბის ფინანსური ორგანიზაცია არ არის, დიდწილად, ის ევროპის პოლიტიკასაც განსაზღვრავს. 

საარჩევნო კოდექსში რეფერენდუმისა და პოლებისციტის დეფინიცია იცვლება და, მსგავსად არჩევნებისა, მითითებულია, რომ უნდა ჩატარდეს სახელმწიფო საზღვრებში. ახალი რედაქციის კოდექსი პარლამენტში უკვე ინიცირებულია „ქართული ოცნების" დეპუტატების მიერ. ოპოზიცია აცხადებს, რომ ემიგრანტებისთვის საზღვარგარეთ ხმის მიცემის უფლების შეზღუდვა პოლიტიკური შურისძიებაა იმ შედეგების გამო, რაც 2024 წელს საზღვარგარეთის უბნებზე დაფიქსირდა. ამაზე „ოცნებაში" პასუხობენ, რომ 2024 წელს ხმა დაახლოებით 34 ათასმა ემიგრანტებმა მისცა, რაც სულ რაღაც 2%-ია, რასაც „გავლენა ვერ ექნებოდა".

პოლიტოლოგ იგორ კვესელავას არ სჯერა, რომ ევროკავშირმა ადამიანის უფლებათა დაცვის საკითხებზე საქართველო-ევროკავშირის შეხვედრა ქართულ დელეგაციაში მყოფი პირების გამო გადადო. ფიქრობს, რომ საქართველო უფრო ფრთხილი უნდა იყოს ევროპის კრიტიკაში, რადგან ამით ისევ და ისევ ჩვენი ქვეყანა ზარალდება. დარწმუნებულია, რომ ხელისუფლება ვადამდელი არჩევნებისთვის ემზადება, რომელიც, დიდი ალბათობით, რომ 2026 წელს ჩატარდება.

კანონი, რომელსაც პარლამენტი იმ არასრულწლოვნებზე იღებს, ვისზეც დასაბუთებული ვარაუდია, რომ სისხლის სამართლის კოდექსით გათვალისწინებული ქმედება ჩაიდინეს, განხილვის ეპიცენტრშია, საზოგადოების ნაწილი ამას პოზიტიურად შეხვდა, ნაწილი კი აკრიტიკებს. „ოცნებაში" აცხადებენ, რომ საუბარი არ არის პენიტენციურ დაწესებულებაზე, არამედ აღნიშნული ცენტრები მოზარდების განვითარებაზე იქნება ორიენტირებული.

პრეზიდენტმა დონალდ ტრამპმა რუსეთსა და უკრაინას შორის შემუშავებულ სამშვიდობო გეგმას მხარი დაუჭირა - ინფორმაცია ამერიკულ პრესაში პრეზიდენტის ადმინისტრაციის მაღალჩინოსანზე დაყრდნობით ვრცელდება. 28-პუნქტიანი დოკუმენტი სკანდალურ მუხლსაც შეიცავს, მათ შორის რუსეთისთვის აღმოსავლეთ უკრაინის იმ რეგიონების გადაცემასაც, რომელსაც რუსეთი ამჟამად აკონტროლებს. თუმცა ექსპერტები ფიქრობენ, რომ ასეთ ინიციატივას რეალური პერსპექტივა არ გააჩნია. რა წერია დოკუმენტში და რას ამბობენ ამერიკული და უკრაინული მხარეები?

მმართველი პარტია მიიჩნევს, რომ ევროპის საბჭოს საპარლამენტო ასამბლეის დელეგაცია წინასწარ დაწერილი დასკვნით ჩამოვიდა. თავად დელეგაციის წერვები სამდღიან ვიზიტს აჯამებენ და „ოცნებას" მოუწოდებენ, რომ ბოლო პერიოდში მიღებული ცნობილი კანონები გააუქმონ და ოპოზიციონერ ლიდერებზე სამართლებრივი დევნა შეწყვიტონ.

19 ნოემბერს, 20 წლის მათე დევიძის დაპატიმრებიდან ერთი წლის თავზე, სოლიდარობის მარში გაიმართა, სადაც პოლიციამ 13 ადამიანი დააკავა. შსს მათ კანონის დაუმორჩილებლობასა და პოლიციელების შეუარაცხყოფაში ადანაშაულებს. თავად ბრალდებულების ადვოკატები ამბობენ, რომ პირიქით, პოლიციელები აგინებდნენ მონაწილეებს და ძალით სვამდნენ მანქანებში.

მიმდინარე წლის მესამე კვარტალში, საქართველოში უმუშევრობის დონე შემცირდა და 13.3% გახდა. სტატისტიკის ეროვნული სამსახურის მონაცემებიდან დასტურდება, რომ შარშანდელ ანალოგიურ პერიოდთან შედარებით, უმუშევრობა 0.5%-ით შემცირდა. ეკონომისტები ამ ფაქტს დადებითად აფასებენ და ამბობენ, რომ ბოლო წლების სტატისტიკის მიხედვით, უმუშევრობა ყოველწლიურად მცირედით, მაგრამ მაინც იკლეს. ეს კი გრძელვადიან პერსპექტივაში, საკმაოდ დიდ გაუმჯობესებას მოიტანს. 

რუსეთში საემიგრაციო პოლიტიკის გამკაცრებამ ქართველ გადამზიდავებს სერიოზული პრობლემა შეუქმნა. ქვეყნის ტერიტორიაზე წლის განმავლობაში ყოფნის ვადა 180-დან 90 დღემდე შემცირდა. ნებისმიერ მძღოლს, ვინც მეტი ხნით დაყოვნდება რუსეთში, მითითებულ ვადას გადააცილებს, აჯარიმებენ და ხუთწლიან დეპორტს უფორმებენ. ოფიციალური მონაცემით, 100-მდე მძღოლი უკვეგამოძევებულია. ასეთ სიტუაციაში მათ არ აქვთ სხვაგამოსავალი გარდა იმისა, რომ შეაჩერონ საქმიანობა ან ალტერნატიულ ბაზრებზე გადაერთონ.

ადამიანის უფლებათა დაცვის საკითხებზე საქართველო-ევროკავშირის დიალოგის შეხვედრა ევროკავშირის გადაწყვეტილებით გადაიდო. მმართველ პარტიაში ამბობენ, რომ „სრულიად მიუღებელი და გაუმართლებელი საბაბით" მოხდა. ოპოზოციაში კი შეხვედრის ჩაშლას ქართულ დელეგაციაში ისეთი ჩინოვნიკების ყოფნასას უკავშირებს, რომლებსაც დასავლეთი ადამიანის უფლებათა დარღვევაში ადანაშაულებს და მათთვის რამდენიმე დასავლურ სახელმწიფოს პერსონალური სანქციები აქვს დაწესებული.

განათლების სამინისტროში მასწავლებლების კარიერული წინსვლის სქემასთან დაკავშირებით რამდენიმე დღეა პედაგოგებთან შეხვედრები დაიწყო, რის შესახებაც თავად სამინისტრომ გაავრცელა განაცხადებაა, სადაც ნათქვამია, რომ ჯერჯერობით 200-მდე პედაგოგს შეხვდნენ. მასწავლებელთა სტატუსები ისევ ძალაშია, თუმცა, განათლების სფეროს სხვა წარმომადგენლებისთვის ჯერჯერობით უცნობია, რა ახალი მექანიზმი შემუშავდება ამ მიმართულებით.

პოლონეთმა რუსეთს უპრეცედენტო დივერსიის მოწყობაში დასდო ბრალი და გდანსკში მისი ბოლო საკონსულო დახურა. ოფიციალური ვარშავა აცხადებს, რომ უკრაინისკენ მიმავალი რკინიგზის აფეთქება „სახელმწიფო ტერორიზმის" ნაწილია და ამაზე პასუხი მხოლოდ დიპლომატიით არ შემოიფარგლება. მეორეს მხრივ, კრემლი პოლონეთის ხელისუფლებას რუსოფობიაში ადანაშაულებს და აცხადებს, რომ მათი გადაწყვეტილება „საღ აზრს მოკლებულია".